کابل (پژواک، ٢٣ غبرګولى ٩٦) : د امريکا ددفاع وزير وايي چې د افغانستان په اړه د جګړې او نوې تګلارې ستراتيژي به ډېر ژر ولسمشر ډونالډ ټرمپ ته وسپارل شي.
د امريکا ددفاع وزير جېم مېټس دغه څرګندونې پرون په واشنګټن کې دامريکا د سنا مجلس د پوځي چارو کمېسيون ته کړې دي.
هغه زياته کړې : (( زه به ډېر ژر نوې تګلاره ولسمشر ته وړاندې کړم، چې په کې به د افغانستان په ګډون د سيمې په کچه موضوعات شامل وي.))
نوموړي ويلي، په افغانستان کې له تېرو ١٦ کلونو راهيسې جګړه روانه ده او امريکايي پوځي چارواکي ددې هېواد حالات په ښه توګه در ک کولى شي.
دامريکا دفاع وزير ويلي، په دې وروستيو کې د افغانستان حالات خراب شوي هم دي.
مېټس دا څرګندونې په داسې حال کې کړې چې شاوخوا دوه اوونۍ مخکې په کابل کې د موټر بم چاودنې او پر جنازې د ځانمرګو بريدونو له امله تر ٥٠٠ زياتو افغانانو ته مرګ ژوبله واوښته .
دا په تېرو ١٦ کلونو کې تر ټولو خونړۍ پېښې وې چې په افغانستان کې رامنځته شوې دي.
دامريکادفاع وزير ويلي، دوى د افغانستان او د سيمې حالات ارزولي او ډېر ژر به بشپړ راپور ولسمشر ته وړاندې او هغه به يې په رڼا کې پرېکړه وکړي.
د هغه په وينا، په افغانستان کې د ناټو او امريکايي ځواکونو قوماندان جنرال نېکولسن چې د نورو سرتېرو لېـږلو غوښتنه يې کړې، که چېرې دا ومنل شي، نو دا سرتېري به ډېرى تمرکز د افغان ځواکونو پر روزنې کوي.
د امريکا د وسله والو ځواکونو لوى قوماندان جنرال جوزېف ډنفورډ ياد کمېسيون ته ويلي چې ده هم ځينې وړانديزونه ورکړي، څو د افغانستان امنيتي حالت ورسره ښه شي.
تر دې مخکې داسې راپورونه ورکړل شوي چې ګوندې امريکا به په خپلې نوې ستراتيژۍ کې افغانستان ته د درې او پنځو زرو ترمنځ نور سرتېري ولېږي.
ناټو هم تېره مياشت په خپله سرمشريزه غونډه کې اعلان کړى و چې غواړي افغانستان ته نور سرتېري ولېږي.
login or register a new account.
