ولسمشر غني: د بشري قوا عالي شورا رامنځته کوو

کابل (پژواک، ٢٣ غبرګولى ٩٦): ولسمشر غني وايي چې ډېر ژر د بشري قوا عالي شورا رامنځته کېږي، څو د هغه په چوکاټ کې د پوهنتونونو او ښوونځیو په اړه بحثونه وشي او د لوړو زده کړو او ښوونځیو نصاب به په بنیادي توګه بدلون ومومي.

له ارګه د غبرګولي په ٢٣مه پژواک خبري اژانس ته په يوه رالېږل شوې خبرپاڼه کې راغلي چې ولسمشر دغه څرګندونې د خپلو مشورتي کتنو په لړ کې د کابل د پوهنتونونو له ريیسانو، استادانو او محصلینو سره د ليدنې پر مهال کړې دي.

سرچينې زياته کړې، په دې کتنه کې چې په ارګ کې وشوه، پوهاند عصمت الله عثماني او پوهنیار جاوېد صدیقي د کابل د پوهنتونونو د استادانو په استازیتوب خبرې وکړې او د هېواد د وروستيو پېښو په تړاو یې خواشیني څرګنده کړه.

یادو ویناوالو د بهرني سیاست، د فساد پر ضد مبارزې، د لوړو زده کړو د ښه والي، د زېربنایي پروژو تطبیق، له ګاونډیو هېوادونو سره د اوبو مدیریت او ترانزیټي اړیکو ټینګښت په برخو کې د حکومت لاسته راوړنې وستایلې او د حکومت له برنامو یې ملاتړ وکړ.

د پوهنتون استادانو وویل، هېواد د بدلون په حالت کې دی او طبيعي ده چې په داسې حالاتو کې لوړې او ژورې تجربه کوي او خلک باید نهیلې نشي، په بدلون کې تل غبرګونونه وي او اوسنی بدلون ته اړتیا لري. د ټولنې اکاډمیک قشر د دولت تر څنګ ولاړ دی او ملاتړ یې کوي. هغوی له اوسني وضعیته د وتلو لپاره د ملي بحث وړاندیز کوي.

ورپسې شهناز حسني طنین او قدرت الله د کابل پوهنتونونو د محصلینو په استازیتوب د ځوانانو د رسالت په اړه خبرې وکړې او له ولسمشر څخه یې ځوانانو ته د درناوي او مشورو له امله مننه وکړه.

هغوى دې ته په اشارې چې اوسنۍ وضعه د هېچا په ګټه نه ده زیاته کړه، ځوانان باید د هېواد شرایط درک کړي او د هغو کسانو په وړاندې چې غواړي له ځوان ځواک څخه د خپلو شخصي ګټو لپاره استفاده وکړي ودرېږي، ځکه بریا او یووالی په قوت کې نغښتی دی.

دغو محصلينو وويل، حکومت نه شي کولی چې په یواځې توګه له ټولو ننګونو او ستونزو سره مقابله وکړي او اړتیا ده ټول هېوادوال په تېره ځوانان، د اصلاحاتو او د سولې او ثبات په تأمین کې له حکومت سره هر اړخیزه همکاري وکړي. محصلینو وویل، ځوانان باید خپلې غوښتنې د نظام شرایطو او توان ته په پام مطرح کړي.

ولسمشر غني هغوى ته په خطاب کې وويل: ((ستاسو خبرې موږ ته دا ډاډ راکوي چې په سم لوري روان یو، تاسې افغانستان جوړوئ او ثبات او هوساینې ته یې رسوئ چې له دې ژمنې سره افغانستان د دښمنانو د غوښتنو پر خلاف خپل تحول او موخې ته رسېږي.))

هغه څرګنده کړه، په کابل کې د وروسیتو پېښو موخه د کابل پروسې کنفرانس نه جوړېدل و، هغه کنفرانس چې د ملي ادارې تمثیل و او په وروستېو ۱۶ کلونو کې دا لومړی ځل وو چې دغه کنفرانس د افغانستان دولت او د خلکو له خوا مدیریت کېده.

ولسمشر غني وايي: ((د ” کابل پروسې” کنفرانس نړیوال پیوستون جلب کړ او د نړۍ ټولو هېوادونو د افغانستان د دښمنانو بریدونه وغندل او زموږ د خلکو زړورتیا او زغم یې وستایه. هغه زیاته کړه، دښمنان غواړي د هېواد پیوستون، اجماع او ثبات له خطر سره مخ کړي چې باید هغوی ته د دغه کار اجازه ورنکړو.))

هغه ټینګار وکړ اوسنۍ جګړه د ټولنې پر وړاندې د خلکو د مورال کمزوري کولو، نفاق اچونې، د بنسټ جوړولو، د ملي ګټو، اساسي قانون او د نوي ځوان نسل، ښځو او د افغانستان د ملت پر ضد سراسري جګړه ده؛ ځکه دښمن د افغانستان د امنیتي او دفاعي ځواکونو پر وړاندې ماته خوړلې ده.

ولسمشر د سولې بهیر په اړه وویل، په دې برخه کې د لارې نقشه جوړه شوې او هرې موافقې ته چې ورسېږي، جدي نړیواله څارنه به وي او له پاکستان سره هم د سولې غوښتونکى دي، داسې سوله چې عزت، اعتبار او تداوم په کې نغښتي وي.

نوموړي څرګنده کړه، افغانستان پر ځانګړي هېواد له تکیې وتلی او اوس د مرکزي اسیا يوه نه بېلېدونکې برخه ده او د ترانزیټ له پلوه به پنځو ورځو کې له اروپا سره ونښلول شي.

هغه وویل، افغانستان به تر راتلونکو دوو میاشتو پورې له ازبکستان سره سوداګريز او ترانزیټي موافقتنامه لاسلیک کړي او د وروسیتو ۱۵کلونو په پرتله په ټولو برخو کې د منځنۍ اسیا له هېوادونو سره د افغانستان اړیکې زیاتې پراخې شوې دي.

ولسمشر د یو ملي بحث پر اړتیا ټینګا وکړ او ویې ویل، د خلکو له بېلابېلو اقشارو سره يې ليدنې او خبرې به په هېواد کې د سراسري بحث پیل وي او باید یوه قوي سیاسي او اجتماعي اجماع رامنځته شي. هغه وویل، د کابل د امنیت په اړه به د یو ملي بحث له لارې یوې پایلې ته ورسېږي او په دې برخه کې د ټولو خلکو نظر مهم دی.

هغه زیاته کړه، د مثبت او منفي ازادۍ تر منځ باید توپیر وشي، د لېږد بهیر د تحول ایجاب کوي او په دغه لاره کې مقاومت وي.

ولسمشر غني وويل: ((زه هېڅ کوم یو حزب، قوم، لوري او ژبې پورې تړاو نه لرم، بلکې مسلمان او افغان یم، د سړي او ښځې ترمنځ مساوات ته ژمن یم او ولسمشرۍ بنسټ د نښلولو ځای دی نه د جلا کولو.))

د نوموړي په وينا، د یو قوي دولت لرلو لپاره، قوي اجماع ته اړتیا ده، د امنیت او سولې ټینګښت لپاره قوي او مسلکي ځواکونو ته اړتیا شته .

هغه وويل، پوهنتونونه او علمي بنسټونه په ملت جوړونه کې اساسي ونډه لري او باید سیمه پېژندونکي کدرونه وروزي، څو له خپلو شرایطو او سیمې ښه درک پیدا کړى شي.

ولسمشر محصلینو ته په خطاب کې وویل چې تر راتلونکو څو اونیو پورې د بشري قوا عالي شورا رامنځته کېږي، څو د هغې په چوکاټ کې د پوهنتونونو او ښوونځیو په اړه بحثونه وشي او د لوړو زده کړو او ښوونځیو نصاب به په بنیادي توګه بدلون وکړي.

هغه زیاته کړه، اوسمهال د زده کړو بڼه بدله شوې او د پوهنتونونو استادانو او اکاډمیکو بنسټونو څخه یې وغوښتل چې په دې برخه کې دې خپل نظرونه او وړاندیزونه د بشري قواو عالي شورا سره شریک کړي.

ولسمشر وايي، د هند له لومړي وزیر سره په ليدنه کې دغه هېواد ژمنه وکړه چې د ټاکنو په برخه کې به له افغانستان سره مرسته وکړي او د افغانستان د ولسي جرګې او جمهوري ریاست ټاکنې به پر خپل وخت ترسره شي؛ ځکه خلک د انتخابولو او انتخابېدلو حق لري.