په کابل کې د حنجرې لومړي بريالي جراحي عمليات تر سره شول

کابل(پژواک، ١٤وږى ٩٦): د لومړي ځل لپاره په هېواد کې د يوه ماشوم د حنجرې جراحي عمليات د افغان متخصصانو  له لوري د کابل په غازي امان الله خان روغتون کې په برياليتوب سره تر سره شول.

  د ملي امنيت عمومي رياست، پژواک خبري اژانس ته په را استول شوې خبرپاڼه کې ويلي چې دا عمليات د اته کلنې سعيدې پر  حنجره تر سره شول چې له نفس تنګي، غږ لرونکي تنفس او لوېدلي غږ نه ځورېدله.

ويل کېږي چې دا ماشومه د روان کال د وري په ١٢مه نېټه له بدخشان نه کابل ته را لېږدول شوې وه او  د ملي امنيت ادارې اړوند  د غازي امان الله خان روغتون  د غوږ او ستونې څانګه کې بستر شوه.

 په خبرپاڼه کې راغلي چې د عبدالمالک غياثي په مشرۍ معالجې ډلې د (Video laryngoscopy)معايناتو له تر سره کولو وروسته د دغې ماشومې جراحي عمليات په (Micro laryngeal Surgery ( طريقه سره په برياليتوب تر سره کړل.

په خبرپاڼه کې په ډاګه شوې چې د ناروغ عمومي وضعيت ښه دى، د تکليف ټولې نښې يې له منځه تللې او بشپړه روغتيا يې موندلې ده.

د ملي امنيت رياست په ډاګه کړې چې د ناروغ درملنه تر دې وړاندې په بېلابېلو کورنيو او بهرنيو روغتونونو کې تر سره شوې، خو پايله يې مثبته نه وه.