کابل (پژواک، ١٦ وږى ٩٦): په کابل کې د چين سفير وايي، هيله لري چې د امريکا نوې ستراتيژي د افغانستان په ګټه تمامه شي.
نوموړي دغه مطلب بدخشان ولايت ته د سفر په ترڅ کې يوې خبري غونډې ته څرګند کړ.
په کابل کې د چين سفير ياوجينګ په بدخشان کې له امنيتي وضعيته د خپل هېواد د اندېښنې په اړه وويل چې ترهګري يوه سيمه ييزه او نړيواله مسئله ده او بايد د دې ښکارندې پر وړاندې نړيواله مبارزه وشي.
هغه زياته کړه: "هيله لرو چې په افغانستان د امريکا پوځي ستراتيژي د دغه هېواد په ګټه تمامه شي."
هغه وويل: "موږ د ختيځ ترکستان خوځښت د غړو د فعاليت په اړه چې کسان يې د طالبانو په څنګ کې جنګېږي، سخت اندېښمن يو؛ موږ له ترهګرۍ سره د مبارزې په اړه د چين، افغانستان او تاجکستان تر منځ درې اړخيزه ملګرتيا رامنځته کړې او په افغانستان کې د سولې پلويان يو."
د چين سفير د بدخشان له والي سره په رسمي ليدنه کې د دغه ولايت له خلکو سره ژمنه وکړه چې په نږدې راتلونکي کې به د چين له کاشغر څخه د نوري فايبر شبکې لين له بدخشان سره ونښلول شي.
نوموړى پرون د اشکاشم ولسوالۍ ته ولاړ او د واخان له ولسوال نصرت الله نايل او د اشکاشم ولسوالۍ له ولسوال نامدار خان خالد سره يې وليدل او د دغو دوو ولسواليو د خلکو ستونزې يې واورېدې.
د واخان ولسوال نصرت الله نايل وويل چې د واخان او اشکاشم ولسواليو د خلکو اساسي ستونزې د سټندرد روغتيايي مرکزونو نه شتون دی او دغه کار د دې لامل شوى چې يو شمېر اميدوارې ميندې د زېږون پر مهال خپل ژوند له لاسه ورکړي او دغه راز د ښوونځيو د ودانۍ، برېښنا او سړک نه شتون هغه ستونزې دي چې د دې ولسوالۍ خلک ورسره مخ دي.
د چين سفير ژمنه وکړه، هېواد یې چمتو دى چې د بدخشان له خلکو سره په ولسواليو کې د مواصلاتي لارو جوړولو، روغتيا او ښوونې سکتور په وړو پروژو کې مرسته وکړي.
نوموړي له هغوى وغوښتل چې خپل وړانديزونه دې د ولايت له لارې د چين سفارت ته ورکړي.
هغه وويل: "له دغه سفر څخه زموږ موخه، د بدخشان په ځانګړې توګه د سرحدي ولسواليو د خلکو د ستونزو څېړل دي؛ موږ د بدخشان له خلکو سره مرستې ته ژمن يو او دا خبره څېړو چې څه کار کولى شو."
غړي
You need to subscribe to view the full article. Please login or register a new account.









