کورنيو چارو وزارت: د کابل ځانمرګي بريد کې درې تنه ټپيان شوي

لومړى تعقيب-کابل (پژواک، ٢ تله ٩٦): د کورنيو چارو وزارت وايي چې د کابل ښار د پنځمې حوزې په اړونده د افشارو سيمه کې د ځانمرګي بريد له امله درې ملکي وګړي ټپيان شوي دي.

 د ياد وزارت له لوري په رالېږل شوې خبرپاڼه کې ويل شوي چې نن له غرمې وړاندې يوولس بجې يوه ځانمرګي بريدګر له چاودېدونکو توکو ډک يوه کرولا موټر څخه په ګټې د کابل د پنځمې حوزې اړونده افشارو سيمه کې د بهرنيو ځواکونو پر کاروان بريد کړى دى.

د خبرپاڼې د معلوماتو پر بنسټ، په ياد ځانمرګي بريد کې درې ملکي کسان  ټپيان شوي، چې په خپل وخت سره د پوليسو له لوري روغتون ته لېږدول شوي دي.

کابل کې مېشتو بهرنيو ځواکونو تر اوسه پورې په دې اړه څه نه دي ويلي.

وسله والو طالبانو د يادې پېښې مسووليت پر غاړه اخيستى دى.

 د وسله والو طالبانو وياند ذبيح الله مجاهد پژواک خبري اژانس ته په رالېږل شوي برېښناليک کې ويلي  چې دغه بريد د دوى له لوري ترسره شوى دى.

 مجاهد ادعا کړې چې په دغه بريد کې ١٦ بهرنيو ځواکونو ته مرګ ژوبله اوښتې ده.

 نوموړي دغه راز ويلي، په دغه بريد کې د بهرنيو ځواکونو درې ټانکونه هم ويجاړ شوي دي.