<p>مزارشريف (پژواک، ۵ سلواغه ۹۶): د بلخ نوی والي انجينر داوود وايي چې له فساد سره مبارزه يې په لومړيتوبونو کې ده او د دغه ولايت فاسدین به عدلي او قضايي ارګانونو ته وسپاري.</p>
<p>نوموړي دغه څرګندونې په يو ويډيويي پيغام کې کړې چې يوه کاپي يې د سلواغې په ٥مه پژواک خبري اژانس ته لېږل شوې ده.</p>
<p>هغه په دغه پيغام کې ويلي چې په بلخ ولايت کې به د والي په توګه خپلې چارې د ټولنې له ټولو قشرونو سره په مشوره مخې ته وړي.</p>
<p>انجنير داوود که څه هم، څه باندې يو مياشت کېږي، د ولسمشر له خوا د بلخ د والي په توګه ګومارل شوی؛ خو د بلخ د پخواني والي عطامحمد نور د مخالفت له امله يې لا هم خپله دنده نه ده پيل کړې او په کابل کې اوسېږي.</p>
<p>نوموړي له کابله د بلخ رسنيو ته په خپل ويډيويي پيغام کې په دغه ولايت کې د والي په توګه د دندې له پيلېدو سره سم په دولتي ادارو کې د فساد پر وړاندې د جدي مبارزې پيلولو يادونه هم کړې ده.</p>
<p>ده زياته کړه: ((د تېرو ۱۶ کلونو پر مهال په بلخ کې ډېر کار شوی، خو په دولتي ادارو کې فساد هم شته دی، زه به د دغه فساد پر وړاندې کار کوم او فساد پېشه خلک به ورک کړم.))</p>
<p>د بلخ نوي والي وويل چې د فساد ورکېدو بنسټيزې طرحې او د پلی کېدو لپاره عزم لري چې د بلخ له خلکو او په ځانګړې توګه له ځوانانو يې په دې برخه کې د همکارۍ غوښتنه وکړه.</p>
<p>نوموړي زياته کړه، له هېچا سره به په کينه چلند ونه کړي، خو په دولتي ادارو کې به اصلاحات ضرور راولي.</p>
<p>د هغه په وينا، هغه خلک چې په فساد کې ښکېل وي، د عدلي او قضايي ارګانونو له لارې به پرې قانون پلی کوي.</p>
<p>نوموړي د يو هېواد چارې د محلي او مرکزي حکومت له اړيکو پرته ناشونې وبللې.</p>
<p>انجنير داوود وايي: ((لومړی کار به زه دا کوم چې د محلي حکومت اړيکې به له مرکزي حکومت سره ټينګوم.))</p>
<p>نوموړي په ټولو برخو کې د بلخ خلکو ته د سمو خدمتونو وړاندې کېدو لپاره له مرکزي حکومت سره اړيکې اړينې وبللې.</p>
<p>هغه همداراز ټينګار وکړ، هېچا او هېڅ ډلې ته به په بلخ کې د قومي سياست کولو ته اجازه ورنه کړي.</p>
<p>نوي والي بلخ د نسبي امنيت لرونکی ولايت وباله او ژمنه يې وکړه چې دغه ولايت به په بشپړ امنيت لرونکي ولايت تبديلوي.</p>
<p>د هغه په وينا له امنيتي ځواکونو سره به په ګډه کار کوي.</p>
<p>انجنير داوود ژمنه وکړه چې په بلخ کې به داسې نظامي طرحې به عملي کړي، چې په شاوخوا ولايتونو کې به هم د داعش او وسلوالو طالبانو پر وړاندې ښه پايلې ولري.</p>
<p>انجينر داوود د بلخ د سوداګريز چارو په تړاو ويلي چې ډېره پاملرنه به صادراتي چارو ته وکړي، چې د اقتصادي پرمختګ تر څنګ له دې لارې خلکو ته د کار زمينه هم برابره شي.</p>
<p>هغه ټينګار وکړ چې د بلخ له پخواني والي عطامحمد نور سره هېڅ ډول مشکل نه لري، بلکې هغه يې د جهاد وختونو ملګری او خپل ورور ياد کړ.</p>
<p>نوموړي اوسنۍ شخړه د عطاء محمد نور او ارګ تر منځ وګڼله .</p>
<p>ده هيله وښوده چې د خبرو اترو له لارې به سياسي ستونزې حل شي او دی به ډېر زر د بلخ د والي په توګه خپله دنده پيل کړي.</p>
<p>انجنير داوود وويل، کله چې يې د بلخ د والي په توګه دنده پای ته ورسېده؛ نو په ډېر عزت او وقار به يې پرېږدي.<a name="_GoBack" id="_GoBack"></a></p>
