خوست کې د لرو پښتنو د ملاتړ په موخه لاریون وشو

خوست ښار (پژواک، ٨ کب ۹۶): په خوست کې يو شمېر خلکو د لرو پښتنو له حقونو د ملاتړ په لاريون کې له نړيوالې ټولنې وغوښتل چې پاکستان کې مېشتو پښتنو قومونو ته دې خپل حقونه ورکړل شي.

دغو لاريون کوونکو چې شمېر يې شاوخوا درې سوو تنو ته رسېده، د خوست ښار لوېديځ لوري ته د قبايلو رياست تر څنګ لاريون وکړ، د لرو پښتنو په ملاتړ او د پاکستان د حکومت خلاف شعارونه يې ورکول.

دوی د پاکستان پر حکومت نيوکه کوله چې په هغه هېواد کې یې پښتانه له خپلو حقونو محروم کړي، مشران او ځوانان يې په بېلابېلو نومونو وژلي او دا لړۍ يې روانه ساتلې ده.

يوه لاريونوال ميرناګل تڼيوال په خپلو خبرو کې له نړيوالې ټولنې وغوښتل چې د پاکستان د حکومت خلاف د لرو پښتنو غږ واوري او له ظلم څخه يې وژغوري.

هغه وويل: ((د پاکستان حکومت د تاريخ په اوږدو کې پر پښتنو ظلم کړی دی. موږ دا نه شو زغملی چې زموږ لر وروڼه دې په ظلم او وحشت کې ژوند وکړي.))

دوی همدارنګه د ټولو هغو ولايتونو پر اوسېدونکو چې په ورځنۍ راکړه ورکړه کې له پاکستانۍ کلدارو ګټه اخلي، غږ وکړ چې پر ځای يې افغانۍ رواج کړي.

بل لاريون کوونکي سپين روان نورزي وويل: ((موږ پر ټولو افغانانو غږ کوو چې پاکستانۍ کلداره بنده کړي. همدرانګه له سوداګرو هم غوښتنه کوو چې له پاکستان سره هر ډول سوداګري وتړي؛ ځکه موږ نه غواړو چې پاکستان په اقتصادي لحاظ پياوړی شي.))

د دغه لاريون ګډونوالو د يوه پرېکړه ليک په خپرولو سره د ملګرو ملتونو د امنيت له شورا وغوښتل چې پاکستان د ترهګرو په لېست کې شامل کړي او د ترهګرۍ د تمويلوونکي هېواد په توګه دې وپېژندل شي.

په پرېکړه ليک کې دغه راز راغلي چې ټول افغانان په يوه غږ د پاکستان له حکومته جدي غوښتنه کوي چې په هغه هېواد کې مېشتو پښتنو ته هغه حقوق ورکړي چې په يوه ويشتمه پيړۍ کې د متمدنو انسانانو حقوق ګڼل کېږي.

د يادونې ده چې په پاکستان کې د پښتنو تر بې ساري خوځښت وروسته د افغانستان په بيلابيلو ولايتونو کې هم خلکو د پاکستان د حکومت پر ضد لاريونونه وکړل او په هغه هېواد کې د پښتنو د حقوقو غوښتنه وکړه.