خوست ښار(پژواک، ۹ کب ۹۶): د خوست ولايتي شورا مرستيال د محکمې له قاضيانو سره د لانجې په پايله کې پر يوه مياشت تنفيذي بند محکوم شوی دی.
د خوست ولايتي شورا رييس کفيل ريحان پژواک اژانس ته وويل چې د شورا مرستيال قديم افغان څه موده مخکې قاضيانو ته په توهين تورن شوی او بيا لومړنۍ محکمې پر يوه مياشت بند محکوم کړی دی.
نوموړي وويل: ((يوه مياشت مخکې قديم افغان له خپل يوه موکل سره محکمې ته تللی و، هلته يې بيا له کوم قاضي سره لانجه کړې، هغوی بیا پر توهين تور کړی او بيا يې دوسيه ورته جوړ کړې وه.))
د ولايتي شورا رييس کفيل ريحان زياته کړه چې د لومړنۍ محکمې د حکم له اورېدو وروسته قديم افغان نن د خوست مرکزي زندان ته ولېږل شو.
په ورته وخت کې د ولايتي شورا محکوم شوی مرستيال قديم افغان له زندانه د تيلېفون په کرښه پژواک اژانس ته وويل چې د يادې پرېکړې په کولو له ده سره ظلم شوی دی.
هغه وويل چې شاوخوا درې مياشتې مخکې د خپل موکل د دوسيې پوښتنې لپاره محکمې ته تللی و، کله چې يې د استيناف محکمې د رييس پوښتنه کوله، يوه قاضي ورسره ناسم چلند کړی و.
نوموړي زياته کړه: ((دروازه مې وټکوله، پوښتنه مې وکړه چې رييس صاحب چېرې دی، قاضي راته وويل چې په جېب کې مې دی، ما وويل چې رييس صاحب مې په کار دی، بيا يې وويل چې په جېب کې مې دی. ورته ومې ويل چې سمې خبرې کوه، نو په دې وخت کې يې د احمق کلمه راته وکاروله، له هغه وروسته يې راسره لانجه وکړه.))
قديم افغان وويل چې څلور شاهدان يې پيدا کړي وو، هغه ټول يې د خپلې ادارې کارکوونکي وو او پر ما يې ناحقه شاهدي وويله.
د خوست د استيناف څارنوالۍ د دې ولايت د ولايتي شورا د مرستيال د زنداني کېدو پخلى کړى دى.
د استيناف څارنوالۍ رئيس رحيم الله رامح، پژواک څبري اژانس ته وويل چې د ولايتي شورا مرستيال قديم افغان محکمې ته له اجازې پرته داخل شوى، هلته يې له يوه قاضي سره لفظي شخړه او مشکل راپيښ شوى او قاضي بيا ورباندې محضر جوړ کړى او همدا محضر بيا د خوست څارنوالۍ ته رالېږل شوى دى.
ده زياته کړه، څارنوالۍ د قانون په رڼا کې ياده موضوع څېړلې او بېرته يې محکمې ته لېږلې ده. ابتدايه محکمې پرون پر قديم افغان، قاضي ته د توهين په تور د يوه مياشتې تنفيذي بند حکم کړى او همدا حکم بېرته څارنوالۍ ته را استول شوى او څارنوالي نن د ياد شوي حکم د عملي کېدو په خاطر د ولايتي شورا ياد شوى غړى محبس ته ولېږه.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن