<p style="text-align: justify;">پل علم- چاریکار (پژواک، ۱۴ زمری ۱۴۰۳): د لوګر په مرکز پُلعلم کې د اوبو رسولو یوې شبکې چارې بشپړې او د پروان په سرخ پارسا ولسوالۍ کې د ورته یوې بلې شبکې جوړولو چارې پیل شوې.</p>
<p style="text-align: justify;">د لوګر کلیو پراختیا او بیارغونې ریاست مطبوعاتي مسوول صبغتالله نائبخېل پژواک ته وویل، د څښاک پاکو اوبو رسولو دغه شبکه د مرکز پل علم ښار اړوند بابوس نواباد سیمه کې د ملګرو ملتونو د ماشومانو ملاتړ صندوق (UNICEF) له لوري د یوه کال په موده کې جوړه او ګټې اخیستنې ته وسپارل شوه.</p>
<p style="text-align: justify;">نوموړي زیاته کړه: «د څښاک پاکو اوبو دغې شبکې ته یوه ۸۰ متره ژوره څاه، ۱۸ تختې سولر، ۲۰ متره مکعبه د اوبو ذخیره، کورونو ته ۵ زره متره د اوبو پايپ غځول او ۱۱۳ د اوبو نلکۍ نصب شوې دي.»</p>
<p style="text-align: justify;">نائبخېل وايي چې د یادې شبکې پر جوړېدو څه باندې شپږ میلیونه افغانۍ لګول شوې او د دغې سیمې لسګونو اوسېدونکو ته یې د څښاک پاکې اوبه برابرې کړې دي.</p>
<p style="text-align: justify;">دغهراز د بابوس سیمې یوه اوسیدونکي محمدالله پژواک ته وویل، له دې مخکې د بابوس سیمې اوسېدونکي د څښاک پاکو اوبو برابرولو برخه کې ستونزې درلودې.</p>
<p style="text-align: justify;">هغه وايي چې اوس تر ډېره د دوی یاده ستونزه حل شوې ده.</p>
<p style="text-align: justify;">د یادونې وړ ده چې تر دې مخکې هم په لوګر کې د څښاک پاکو اوبو رسولو شبکې جوړې شوې چې دا مهال زرګونه کورنۍ ترې ګټه پورته کوي.</p>
<p style="text-align: justify;">دغهراز د یو بل خبر مخې، پروان کې د څښاک پاکو اوبو د یوې شبکې د جوړولو چارې پيل شوې.</p>
<p style="text-align: justify;">د پروان د کلیو پراختیا او بیارغونې رييس ملا عبدالصمد صادق پژواک ته وویل چې د دغه ولایت د سرخ پارسا ولسوالۍ په ګنبد کلي کې د څښاک پاکو رسولو یوې شبکې د جوړولو چارې پيل شوې.</p>
<p style="text-align: justify;">هغه وايي چې د دغې شبکې پر جوړولو ۳،۵ میلیونه افغانۍ لګښت راځي.</p>
<p style="text-align: justify;">هغه وايي چې د یادې شبکې د جوړولو لګښت د حکومت له بودجې ورکول کېږي چې د چارو په بشپړېدو سره به یې سلو کورنیو ته د څښاک پاکې اوبه برابره شي.</p>
<p style="text-align: justify;">د سیمې اوسېدونکي هم د یادې پروژې د چارو پيل ته خوښ دي.</p>
<p style="text-align: justify;">د ګنبد کلي اوسېدونکی نجم الدین وايي چې دا مهال دوی د څښاک پاکې اوبه نه لري.</p>
<p style="text-align: justify;">هغه هیله وښوده چې د یادې پروژې په بشپړېدو سره به د دوی د څښاک اوبو د نشتوالي ستونزه حل شي.</p>
