کابل (پژواک) ـ د ټولګټو وزارت وایي، د روان کال په ترڅ کې یې د هېواد په بېلابېلو ولایتونو کې د سړکونو د ساتنې او څارنې ۴۹ پروژې د څه باندې ۸۴۶ میلیون افغانیو په ارزښت له خصوصي ساختماني شرکتونو سره قرارداد او چارې یې پیل کړې دي.
د ټولګټو وزارت ویاند محمداشرف حقشناس نن پر خپله اېکسپاڼه لیکلي چې د ټولګټو وزارت د روان ۱۴۰۵ کال په جریان کې د هېواد په بېلابېلو ولایتونو کې د سړکونو د ساتنې او څارنې د ۴۹ پروژو چارې د ټولټال ۸۴۶ میلیونه، ۴۸۵ زره او ۹۳۴ افغانیو په ارزښت له بېلابېلو خصوصي ساختماني شرکتونو سره قرارداد او پیل کړې دي.
هغه زیات کړې چې په یادو پروژو کې د سړکونو ترمیم، بیارغونه، جغلاچونه، پراخول، د سړکونو د فرش ترمیم، د ګارډرېلونو نصب، د استنادي دېوالونو، پلونو او پلګوټو د بیارغونې چارې شاملې دي.
نوموړي لیکلي چې د ټولګټو وزارت په ۱۴۰۵ کې په ټولیزه توګه د تېر کال انتقالي او د روان کال نوې قرارداد شوې ۸۳ د ساتنې او څارنې پروژې تر کار لاندې لري چې دا مهال یې چارې په بېلابېلو پرمختګونو سره عملاً جریان لري.
هغه زیاته کړې، د دغو پروژو په بشپړېدو سره به د هېواد ترانسپورټي زیربناوې پیاوړې، د سړکونو وضعیت ښه او د موټرو د تګ راتګ لپاره به مناسب شرایط برابر شي.
همدارنګه به د سوداګریزو توکو د لېږد رالېږد ستونزې تر ډېره راکمې او د سړکونو د لا زیات تخریب مخه به ونیول شي.
د حق شناس د معلوماتو له مخې، د روان ۱۴۰۵ کال په جریان کې د ۳۷ ساتنې او څارنې پروژو چارې د یو میلیارد، ۲۷۱ میلیونه، ۷۴۳ زره او ۸۱۹ افغانیو په ارزښت بشپړې شوې دي چې موخه یې د هېوادوالو لپاره د خوندي تګ راتګ زمینه برابرول او د سړکونو د لا زیات تخریب مخنیوی دی.
