اسعداباد (پژواک) – د کونړ د اطلاعاتو او فرهنګ ریاست وایي چې د دغه ولایت په ناړۍ ولسوالۍ کې د نږدې ۴۹ میلیون افغانیو په لکښت د یوه کیبلي پله جوړولو چارې پیل شوې.
د کونړ د اطلاعاتو او فرهنګ ریاست خبرپاڼه کې راغلي چې د دغه پله پر جوړېدو ۴۸.۷ میلیونه افغانۍ لګښت راځي.
دغهراز، د یاد ولایت د کلیو پراختیا او بیارغونې ریاست استازی حاجي مسعود وايي چې یاد پل د ناړۍ ولسوالۍ په څونه ګلې سیمه کې د ۱۴۰ مترو په اوږدوالي او ۳،۲۰ مترو په سور پر کونړ سیند جوړېږي او ۱۷۰ متره نښلونکی سړک به هم ولري.
هغه زیاته کړې چې د دغه پله لګښت د اسلامي امارت له پراختیايي بودیجې ورکول کېږي او چارې به یې د نهو میاشتو په موده کې بشپړې شي.
د کونړ ولایت مقام د دفتر رییس مولوي محمدامین حقپرست ویلي، د پلونو جوړولو چارو ته زیاته پاملرنه شوې او د دغه پله ترڅنګ به په ناړۍ او مرکز اسعداباد کې هم د دوو نورو پلونو جوړولو چارې پیل شي.
