<p style="text-align: justify;">فیضاباد (پژواک، ۱۴ زمری ۱۴۰۳): د بدخشان د اطلاعاتو او فرهنګ ریاست مسوولین وايي، نن یې په دغه ولایت کې د هنر د ودې او فرهنګیانو د هڅونې په موخه د هېواد د یوه هنرمند د نقاشۍ لسګونه اثار د «مخمل خیال» په نوم یوه نندارتون کې نندارې ته وړاندې کړل.</p>
<p style="text-align: justify;">دغه نندارتون د «مخمل خیال» تر نوم لاندې نن د بدخشان ولایت په مرکز فیضاباد ښار کې د یوې ورځې لپاره جوړ شوی و چې لسګونو کسانو ترې لیدنه وکړه.</p>
<p style="text-align: justify;">د بدخشان د اطلاعاتو او فرهنګ رییس انجنیز ذبیحالله د دغه ډول نندارتونونو جوړولو موخه د فرهنګ او نقاشۍ د هنر وده وبلله او ویې ویل، دغه ریاست له فرهنګیانو او نقاشانو هر اړخیز ملاتړ کوي.</p>
<p style="text-align: justify;">هغه زیاته کړه چې بدخشان د هېواد یو فرهنګي ولایت دی چې ډېر فرهنګیان پکې اوسېږي او له هغوی یې وغوښتل څو خپلې هنري وړتیاوې دغه ریاست ته وروړي او هلته یې د یاد ریاست په نګارستان کې نندارې ته وړاندې کړي.</p>
<p style="text-align: justify;">عزیز سوران هغه هنرمند دی چې هنري اثار یې نن په فیضاباد ښار کې نندارې ته وړاندې شوي وو.</p>
<p style="text-align: justify;">هغه وايي چې د هنري کارونو یوازینی لامل یې له وطن او د افغانستان له خلکو سره مینه ده او هڅه کوي چې خپلو هنري کارونه ته په دوام ورکولو سره د هېوادوالو په شونډو مسکا راولي.</p>
<p style="text-align: justify;">هغه زیاته کړه، د بېلابېلو موضوعاتو په اړه یې پر بخمل ۴۷ نقاشي شوي اثار نندارې ته وړاندې شوي او پر بخمل رسامي د لومړي ځل لپاره په هېواد کې د ده له لوری شوې ده.</p>
<p style="text-align: justify;">هغه له اسلامي امارته غواړي چې فرهنګیانو ته د فرهنګي کارونو له لارې د عوایدو ترلاسه کولو زمینه برابره کړي.</p>
<p style="text-align: justify;">د بدخشان یوه فرهنګي معراجالدین رحیمي د یاد نندارتون له جوړېدو هرکلي وکړ او ویې ویل، د دغه ډول پروګرامونه کولای شي د فرهنګ ساتنې او د فرهنګي هویت په غني کولو کې ښه اغېز وکړی.</p>
محمدعثمان ابراهیمي له دغه نندارتونه د لیدنې پر مهال وویل چې د ورته پروګرامونو جوړول په حقیقت کې د فرهنګي کارونو ژوندي ساتل او د فرهنګیانو د وړتیاوو پیاوړي کول دي.
هغه له اسلامي امارته وغوښتل څو هنرمندان د خپلو هنرونو پیاوړي کولو او پراخولو ته وهڅوي.
احمدفرزام
خطاب
روح الله
احمدزۍ
