پاکستان یو ځل بیا کونړ ۱۱۰ توغندي ویشتلی

اسعداباد (پژواک، ٢ ورى ٩٧): چارواکي وايي چې پاکستاني ځواکونو له پرون راهيسې پر کونړ ولايت ١١٠ توغندي توغولي دي.

د دغه ولايت د امنيې قوماندانۍ وياند فريد دهقان د وري په ٢مه پژواک خبري اژانس ته وويل چې دغه بريدونه پرون پيل شوي او اوس هم دوام لري.

هغه زياته کړه چې د پاکستاني ځواکونو له خوا توغول شوي توغندي او د توپ مرمۍ پر دانګام او شلطن ولسواليو لګېدلي دي.

د دهقان په وينا، په دغو بريدونو کې چا ته مرګ ژوبله نه ده اوښتې، خو يو کور ويجاړ او يو شمېر څاروي مړه شوي دي.

د يادونې ده، تېره مياشت د ملي دفاع وزارت ويلي وو چې دوى خپلو ځواکونو ته د ځوابي اقدام امر کړى دى.

پاکستاني ځواکونو له تېرو څو کلونو راهيسې پر کونړ ولايت بريدونه کوي چې له امله يې لسګونو کسانو ته مرګ ژوبله اوښتې ده.

login or register a new account.