“افغان او بهرنيو ځواکونو په جوزجان کې دداعش يو مرکز بمبار کړى”

کابل(پژواک، ۳ ورى۹۷): په افغانستان کې د امريکايي ځواکونو قومانداني وايي چې افغان ځانګړو او امريکايي ځواکونو په شمال کې د داعش وسله والې ډلې يو مرکز په نښه کړى دى.

په هغه خبرپاڼه کې چې د امريکايي ځواکونو د قوماندانۍ له دفتره پژواک اژانس ته رالېږل شوې، راغلي چې د داعش د خرسان څانګه زياتره له پاکستانيو وسله والو جوړه شوې ده .

خبرپاڼې په افغانستان کې د امريکايي ځواکونو د قوماندان جنرال نيکلسن له خولې ويلي دي چې په شمال کې د ازبکستان اسلامي حرکت هم له داعش سره همکاري کوي او کېداى شي لس سلنه ددغې ډلې غړي د نړۍ د بېلابېلو هېوادونو اوسېدونکي دي.

سرچينې ويلي دي چې افغان او امريکايي ځواکونو د وري په ٢مه د جوزجان د درزاب په مغلو سيمه کې د داعش خراسان ډلې مرکز بمبار کړى دى او د هغوى يو شمېر وسله وال يې وژلي دي. 

نيکلسن ويلي (( موږ هر ورځ  په داعش پسې يو او ددې ډلې پرضد اقدام کوو، په هېڅ ځاى کې به ترهګرو ډلو ته خوندي ځاى نه وي او د هغوى پرضد به هوايي بريدونه دوام ولري او موږ به د افغانستان په هر کونج کې هغوى له منځه يوسو .))

افغان او ناټو چارواکو ويلي چې داعش ډلې د ننګرهار ترڅنګ په دې وروستيو کې په کابل او شمال کې خپل فعاليتونه زيات کړي دي.