محمودراقي (پژواک، ٦ ورى ٩٧): د کاپیسا د کلیو د پراختیا ریاست وايي، د تېر کال په اوږدو کې يې په دغه ولايت کې د يو ميليارد او ٦٠٠ ميليونه افغانيو په لګښت د بيارغونې لسګونه پروژې بشپړې کړې دي.
د دغه ولايت د کلیو د پراختیا رییس محمد یونس مموزي پژواک خبري اژانس سره په ځانګړې مرکه کې وويل چې په تېر لمريز کال کې يې د کاپیسا د مرکز په ګډون په پنځو ولسوالیو کې د ملي پیوستون د پروګرام له لارې ۱۵۱ لویې او وړې پروژې ګټې اخیستنې ته وړاندې کړي او د کمو پروژو کارونه لا جریان لري.
هغه زياته کړه چې په دې پروژو کې د اوبو رسونې، د ښوونځیو د جوړولو، د پلونو، پلچکو او استنادي دېوالونو او ځینې نورې پروژې شاملې وي.
نوموړي وويل، پر دې پروژو يو ميليارد او څه د پاسه ٦٠٠ ميليونه افغانۍ لګښت راغلى چې د ماليې وزارت او ځينو بهرنيو موسسو له خوا ورکړل شوى دى.
د ده په وينا، له يادو پروژو يې وخت په وخت کلکه څارنه کړې او په شفافيت سره يې کارونه بشپړ شوي دي.
د کليو د پراختيا رييس وويل، دا پروژې يې د سيمې د شوراګانو په مشورو او وړانديز پيل کړې وې او د هغوى له خوا يې په څارنه کې هم همکاري کېده.
مموزي زياته کړه، په نجراب ولسوالۍ کې يې د ولسي تړون د پروګرام له لارې ٢٥٠ شوراګانې جوړې کړې چې هلته به هم د دوى په وړانديزونو ځينې پروژې پيل شي.
د هغه په وينا، په روان لمريز کال کې به د ولسي تړون پروګرام د دغه ولايت نورو ولسواليو ته هم وغځوي.
د کاپیسا د تګاب ولسوالۍ د میره خېلو سیمې اوسېدونکي حاجي شېرین وايي، د دوى په ولسوالۍ کې د نا امنيو له امله پروژې نه دي پلې شوې.
هغه زياته کړه، د ولسي تړون پروګرام په هغو ولسواليو کې بريالى کېږي، چېرې چې امنيت وي، د تګاب په څېر نا امنه ولسوالۍ کې مثبته پايله نه لري.
دى وايي، ځينې پروژې د تګاب ولسوالۍ لپاره منظورې شوې، خو پيسې يې د خلکو شخصي جېبونو ته تللې دي.
د نجراب ولسوالۍ يو اوسېدونکى حبيب الله وايي، د دوى د سيمې ښوونځي ودانۍ نه لرله او تېر کال ورته ودانۍ جوړه شوې ده.
login or register a new account.
GET IN TOUCH
NEWSLETTER
SUGGEST A STORY
PAJHWOK MOBILE APP