زابل کې دوه پوليس او څلور طالبان وژل شوي

کابل (پژواک، ٧ ورى ٩٧): چارواکي وايي چې په زابل ولايت کې د نښتې پر مهال پوليسو او وسله والو طالبانو ته مرګ ژوبله اوښتې ده.

د زابل د ارغنداب ولسوالۍ ولسوال امير جان الکوزي د وري په ٧مه پژواک خبري اژانس ته وويل چې د شپې دوه بجې وسله والو طالبانو د دې ولسوالۍ په مربوطاتو کې د پوليسو پر پوستو بريدونه وکړل.

هغه زياته کړه، په دې نښتو کې دوه پوليس وژل شوي او اته نور ژوبل دي چې روغتون ته لېږدول شوي دي.

ولسوال دغه راز وويل چې د پوليسو په ځوابي بريدونو کې څلور وسله وال هم وژل شوي او ١١ نور ټپيان دي.

دى وايي چې اوس په سيمه کې وضعيت ښه دى او پاتې وسله وال له سيمې تښتېدلي دي.

وسله والو طالبانو تر اوسه په دې اړه څه نه دي ويلي.