پر ډيورنډ کرښه د افغان او پاکستاني ځواکونو تر منځ نښته رامنځته شوې

خوست ښار (پژواک، ٢٦ ورى ٩٧): چارواکي وايي چې په خوست ولايت کې د ډيورنډ پر کرښه د افغان او پاکستاني ځواکونو تر منځ نښته رامنځته شوې ده.

د خوست ولايت سرپرست امنيه قوماندان سمونوال عبدالحنان ځدراڼ د وري په ٢٦مه پژواک خبري اژانس ته وويل چې دا نښته نن سهار اته بجې د ځاځي ميدان ولسوالۍ په درېيو نقطو کې پيل شوې ده.

هغه زياته کړه چې پاکستاني ځواکونو د لنډوغرو، نازوغر او خاونه غونډۍ پر امنيتي پوستو بريدونه پيل کړي چې د افغان ځواکونو له ځوابي بريدونو سره مخ شول.

ځدراڼ وايي چې تر اوسه دواړو لورو ته د اوښتې مرګ ژوبلې په اړه معلومات نه لري.

د ځاځي ميدان ولسوالۍ يوه اوسېدونکي معلم معراج ګل پژواک اژانس ته د نښتې د تاييد تر څنګ وويل چې دواړه لوري پر يو بل د سپکو او درنو وسلو ډزې کوي.

خو هغه ته هم د مرګ ژوبلې په اړه معلومات نه وو.

د يادونې ده، تېره مياشت د پکتيا ولايت په ډنډي ولسوالۍ کې هم د ډيورنډ پر کرښه د دواړو هېوادونو د سرحدي ځواکونو تر منځ نښته شوې وه.