<p>کندوز (پژواک، ١٨ زمرى ٩٧): په کندوز کې د ولسي جرګې د يو کانديد پلويانو د اعتراض په توګه د دغه ولايت د ټاکنيزو شکايتونو کمېسيون دروازه تړلې ده.</p>
<p>د دغو اعتراض کوونکو چې شمېر شاوخوا درې سوه کسانو ته رسېده، نن له غرمې مخکې شاوخوا لس بجې د ټاکنيزو شکايتونو کمېسيون دروازه وتړله.</p>
<p>د کندوز ولايتي شورا غړي او اعتراض کوونکي مولوي خوش محمد پژواک ته وويل چې د شکايتونو کمېسيون د ولسي جرګې له ځوان نوماند اجمل شاپور سره سليقوي چلند کړى دى.</p>
<p>ده وويل: ((د شاپور نوم يې له لېست څخه ايستلى دى، په داسې حال کې چې همدا اوس د ډېرو غاصبينو، قاتلينو او د نشه يي توکو د کاروباريانو نومونه په لېست کې شته دي.))</p>
<p>دغه راز بل لاريون کوونکي نورالرحمن پژواک ته وويل چې د ټاکنيزو شکايتونو کمېسيون خپلواک نه دى، د يوې ځانګړې کړۍ په خوښه چلند کوي.</p>
<p>ده وويل: ((دغه ځل خو مو دروازه د موقت وخت لپاره تړلې ده، که چېرې شاپور بېرته په لېست کې شامل نه کړي، د دايم لپاره يې دروازه تړو.))</p>
<p>همدارنګه د لاريون یوه تنظيموونکي وحيدالله رحماني پژواک ته وويل چې دوى د کمېسيون دروازه تړلې خو د کمېسيون غړو تر اوسه له دوى سره په دې اړه خبرې نه دې کړې.</p>
<p>نوموړي زياته کړه: ((که خبرې وکړو کېداى شي کومې نتيجې ته سره ورسېږو.))</p>
<p>دا په داسې حال کې ده چې د کندوز د ټاکنيزو شکايتونو کمېسيون چارواکو له رسنيو سره په دې اړه له خبرو کولو ډډه وکړه.</p>
<p>خو بل لور ته د ټاکنيزو شکايتونو کمېسيون د اطلاعاتو او عامه پوهاوي رييس محمد نظري پژواک ته وويل که څه هم له طرزالعمل سره سم د شکايتونو د ثبت لړۍ پاى ته رسېدلې، خو که چېرې ګڼ شمېر خلک د يوې موضوع په اړه شکايت وکړي او اسناد وړاندې کړي، نو کمېسيون يې شکايت ثبتوي.</p>
<p>ده زياته کړه چې د نوماندانو په اړه د شوو شکايتونو څېړلو لړۍ روانه ده او په راتلونکو دوو ورځو کې به د شکايتونو کمېسيون د خپلو څېړنو پايله د ټاکنو له کمېسيون سره شريکه کړي.</p>
