په کابل کې د طالبانو نهه کسیزه ډله نیول شوې

کابل (پژواک،۴تله۹۷): د ملي امنیت ریاست په کابل کې د طالبانو د نهه کسیزې ډلې د نیول کېدو خبرو ورکوي.

د یاد ریاست په هغه خبرپاڼه کې چې نن پژواک ته رارسېدلې راغلي چې یاد کسان د کابل ښار په بېلا بېلو سیمو کې د ملي امنیت د ځانکړې قطعې په عملیاتو کې نیول شوي دي.

په خبرپاڼه کې د نیول شوو کسانو نومونه نجیب الله، طاوس، وطندوست، ګل احمد، عتیق الله، محمد سالم، احسان الله، حضرت خان او امرالدین ښودل شوي دي.

د سرچینې د معلوماتو له مخې د یادې ډلې نیول شوي غړي په ترورېستې فعالیتونو، ماین خښولو، کمین نیولو او په مرکز او ولایتونو کې ترهګرو ته د امنیتي ځواکونو د تلو راتلو په اړه په راپور ورکولو بوخت و چې د ملي امنیت د ځانګړې قطعې ځواکونو نیولي دي.

په خبرپاڼه کې د نیول شوو کسانو د نیول کېدو وخت نه دی په ډاکه شوی.