مزارشريف کې چاودنې څلورو ملکي وګړو ته مرګ ژوبله اړولې

مزارشریف (پژواک، ۱۴ مرغومی ۹۸): د بلخ په مرکز مزارشريف ښار کې ماين چاودنې څلورو ملکي وګړو ته مرګ ژوبله اړولې ده.

د بلخ د امنيې قوماندانۍ مطبوعاتي مسوول عادل شاه عادل د مرغومي په ۱۴مه پژواک اژانس ته وويل چې ياده پېښه نن له غرمې مخکې شاوخوا لس نيمې بجې د لسمې ناحيې په مربوطاتو کې په يوه شخصي موټر کې د ځای پر ځای شوي ماين د چاودنې له امله رامنځته شوه.

هغه زياته کړه چې په دې پېښه کې يو ملکي وګړی وژل شوی او ۳ نور ټپيان دي.

د لسمې ناحيې اوسېدونکي سيد علي پژواک ته وويل چې د پېښې په ځای کې يې څو ټپيان ليدلي دي.

د سيمې دغه اوسېدونکی وايي چې باران حمام په نوي عصري بڼه جوړ شوی او ډېری مراجعين يې مهم کسان دي چې ممکن د چاودنې موخه هم همدا حمام و.

تر اوسه پورې چا د دې پېښې مسووليت نه دی منلی.