کابل (پژواک، ۱۸ کب ۹۸) : د ملي دفاع وزارت سرپرست وایي چې دوی تر اوسه په دفاعي حالت کې دي، که دروانې تر پایه طالبانو بریدونه ونه دول، دوی به پرې یرغلیز بریدونه پیلوي.
د ملي دفاع سرپرست وزیر اسدالله خالد دا څرګندونې نن د کب په ۱۸مه، د کورنیو چارو سرپرست وزیر مسعود اندرابي او د ملي امنیت سرپرست رییس احمد ضیاء سراج سره په یوه ګډه ناسته وکړې.
هغه زیاته کړه چې د هیواد ملي دفاعي ځواکونه د روانې اونۍ تر پایه پورې د سولې د توافقنامې او د ولسمشر اشرف غني د لارښونې سره په دفاعي حالت کې وي.
خالد ګواښ کړی که چیرې د روانې اونۍ تر پایه پورې طالبان خپل بریدونه ونه درول نو د هیواد ملي امنتیي دفاعي ځواکونه به په ټول هیواد کې پر هغوی بریدونه پیلوي.
ده وویل چې تر تړون مخکې داسې پریکړه شوې وه، چې د تاوتریخوالي کمولو اونۍ به تر تړون وروسته پر اوربند تمامیږي، خو کله چې تړون وشو، وسله والو مخالفینو بریدونه پیل کړل.
د نوموړي په وینا، د طالبانو ددې بریدونو له امله ملکي وګړو او سرتیرو ته مرګ ژوبله هم اوښتې ده.
د ملي دفاع وزارت سرپرست هیله څرګنده کړه چې ددې اونۍ تر پایه پورې نه یواځې تاوتریخوالی کم شي، بلکې اوربند ته هم لاره برابره شي.
