ولسمشر یو ځل بیا له طالبانو وغوښتل چې روژې ته په درناوي اوربند وکړي

لسمشر یو ځل بیا له طالبانو وغوښتل چې روژې ته په درناوي اوربند وکړي

کابل (پژواک، ۴ غویی ۹۹) : ولسمشر محمد اشرف غني د روژې مبارکې میاشتې په مناسبت په خپل پیغام کې یو ځل بیا له وسله والو طالبانو وغوښتل چې د اوربند په اړه د حکومت غوښتنه ومني.

په دغه پیغام کې چې پژواک ته رسېدلی، ولسمشر غني ټولو هېوادوالو او مسلمانانو ته د روژې د مبارکې میاشتې د رارسېدو مبارکي ورکړې ده.

هغه زیاته کړې:" د روژې مبارکه میاشت په داسې حال کې راغلې چې د کرونا ویروس په ټول هېواد کې خپور شوی دی. هیله لرم او ډاډه یم چې هېوادوال به د علماوو او عامې روغتیا وزارت لارښوونې په سمه توګه عملي کړي."

ولسمشر غني ویلي چې د افغانستان حکومت له خپلو ټولو سرچینو په ګټې اخیستو سره هڅه کوي چې ټولنه کې د کرونا ویروس مهار کړي او د روژې په مبارکه میاشت کې د ټولنو فقیرو وګړو ته مرستې ورسوي.

هغه زیاتوي:" زموږ پوخ باور دی چې له هرې سختۍ وروسته اساني په مخ کې ده. دا وبا به هم بالاخره تېره شي، خو لکه څنګه چې د عقل او ايمان تقاضا ده، د تدببر لمن به نه پريږدو او د هېواد د هر اوسېدونکي کوښښ باید دا وي چې په هېڅ وجه بې پروایي ونه کړي، څو په دې ډول د تلفاتو اندازه تر وسه وسه کمه شي."

ولسمشر زیاته کړې چې له طالبانو د افغانستان د حکومت او خلکو غوښتنه داده چې د روژې مبارکې میاشتې ته په درناوي دې د اوربند غوښتنې ته لبیک ووایي او د خلکو پر وړاندې دې له جګړې لاس واخلي او سوله ییز ژوند دې خپل کړي.

هغه دوه ورځې مخکې هم له طالبانو غوښتي و چې روژې ته په درناوي اوربند وکړي.

ولسي جرګې هم تېره ورځ له طالبانو وغوښتل چې روژه کې اوربند وکړي.

طالبانو تر اوسه په دې اړه غبرګون نه دی ښودلی.