لوګر کې دوه ځانمرګیان او له چاودیدونکو توک ډک موټر یې له منځه یوړل شو

کابل ( پژواک، ۲۶ غویی ۹۹) : د کورنیو چارو وزارت وایي چې په لوګر ولایت کې دوه  تنه ځانمرګیان او د هغوی له چاودیدونکو توکو ډک موټر له منځه وړل شوی دی.

د کورنیو چارو وزارت ویاند طارق ارین د غویي په ۲۶مه، پژواک اژانس ته وویل چې دا پيښه نن ماخوستن مهال رامنځته شوې ده.

هغه زیاته کړه، دوه تنه ځانمرګیان چې د پل علم ښار ته له چاودیدونکو توکو ډک موتر سره ننوتلي وو، د ازادۍ بيرغ چوک سيمه کې  یې پلان درلود چې  عام خلک په نښه کړي .

خو ارین وایي چې د پل علم ښار د لومړۍ حوزې پوليسو دوی پیژندلي او ویشتي یې دي، چې له امله یې دواړه بریدګر او موټر یې له منځه تللی دی.

د نوموړي په وینا، په دې پيښه کې چاته هیڅ ډول زیان نه دی اوښتی.

وسله والو مخالفینو تر اوسه په دې اړه څه نه دي ویلي.