په سمنګان او کاپیسا کې اتو کسانو ته مرګ ژوبله اوښتې ده

ایبک- محمودراقي (پژواک، ۲۶ زمري ۹۹): په سمنګان کې یوه کس خپلې دوې ورېرې وژلې دي، بلخوا بیا په کاپیسا کې د یوې ښځې د جسد موندل کېدو ترڅنګ د طالبانو او دولتي ځواکونو ترمنځ نښته کې یو پولیس وژل شوی او څلور ملکي وګړي ټپیان شوي دي.

د سمنګان ولایت د امنیې قوماندانۍ د مطبوعاتو مسوول منیر رحیمي پژواک خبري اژانس ته وویل چې تېر ماښام دوه کسان د یوې میراثي موضوع پر سر د خپل ماما له خوا وژل شوي دي.

هغه وایي چې لومړی دغه دوه وژل شوي کسان د خپل ماما کور ته دننه شوي او ماما یې له لفظي شخړې وروسته وهلی او په موټر کې تښتېدلي دي.

د هغه په خبره، د یادو دوو کسانو ماما چې غلام سخي نومېږي، خپل دغه خورییونه تعقیب کړي او د ابیک ښار په چوک کې یې پر ډزو وژلي دي.

منیر وویل چې غلام سخي تښتېدلی، خو د پولیسو تر څار لاندې دی.

د یوه بل خبر له مخې، د کاپیسا د امنیې قوماندانۍ ویاند عبدالشایق شورش وايي چې د دغه ولایت د تګاب ولسوالۍ د الماس خېل درې په بُدراب ساحه کې  د طالبانو په ډزو کې څلور ملکي وګړي چې یوه مېرمن او درې ماشومان دي، ټپیان شوي دي.

طالبانو تر اوسه په دې اړه څه نه دي ویلي.

دغه راز د کاپیسا د امنیې قوماندانۍ ویاند وایي چې نن سهار د کاپیسا د حصه اول ولسوالۍ په اشترګرام سیمه کې د شاوخوا یوې ۲۵ کلنې مېرمنې جسد هم موندل شوی دی.

د هغه په خبره، د دې ښځې هویت تر اوسه نه دی څرګند شوی او د څېړنې لپاره عدلي طب ته استول شوی دی.

شورش زیاتوي چې د وسله والو طالبانو او دولتي ځواکونو ترمنځ په څو ساعته جګړه کې چې تېره شپه د طالبانو له خوا د دغه ولایت د نجراب ولسوالۍ په کوه سابات ساحه کې د دولتي ځواکونو پر پوستو د برید له امله رامنځته شوه، د سیمه ییزو پولیسو یو سرتېری په کې وژل شوی دی.