د پکتیکا خلک: سیمه ییزو پولیسو امنیت ټینګ کړی خو روزنې او وسلو ته اړتیا لري

ښرنه (پژواک، ١٦ وږى ٩٩): د پکتيکا اوسېدونکي وايي چې سيمه ييزو پوليسو د دغه ولايت د امنيت په ټينګښت کې ښه نتيجه ورکړې خو د روزنې او وسلو په برخو کې ستونزې لري.

د پکتيکا ولايتي شورا غړي عبدالمبين فقيرزاده د وږي په ١٦مه پژواک خبري اژانس ته وويل چې د نورو امنيتي ارګانونو په پرتله سيمه ييزو پوليسو د دغه ولايت د امنيت د ټينګښت په برخه کې ښه پايله لرلې ده.

هغه زياته کړه: ((دلته په ډېرو کليو کې موږ سيمه ييز پوليس لرو، تقريباً د جګړې په لومړۍ کرښه کې  همدوى پراته دي، خلک ترې سخت خوشحاله دي او امنيت يې هم ښه ټينګ کړى دى.))

خو ده وويل چې دغه پوليس د روزنې او وسلو په برخو کې ستونزې لري چې اړوند مسوولين بايد ورته اړينه پاملرنه وکړي.

دغه راز د مرکز ښرنې اوسېدونکي عبدالحکيم پژواک ته وويل، که څه هم چې سيمه ييزو پوليسو ته اړينه روزنه نه ده ورکړل شوې خو د امنيت په ټينګښت کې يې رول بد نه دى.

هغه وايي: ((دغه پوليس کله نا کله عامو خلکو ته هم ستونزې جوړوي او يواځېنى علت يې د مسلکي روزنې نشتوالى دى.))

همدارنګه د پکتيکا د يحيى خېلو ولسوالۍ د سيمه ييزو پوليسو قوماندان شېرمحمد پژواک ته وويل چې د خلکو په همکارۍ دوى توانېدلي دي، امنيت ټينګ کړي.

خو دى هم وايي چې د وسلو او روزنې په برخو کې ستونزې لري، بايد حکومت يې ورته حل کړي.

دغه راز د پکتيکا د امنيې قوماندانۍ وياند شاه محمود ارين پژواک ته وويل چې سيمه ييزو پوليسو ته په بېلابېلو برخو کې وخت پر وخت روزنه ورکول کېږي.

ده وويل: ((موږ يې نور مشکلات هم حل کوو او د دغه ولايت د پوليسو رهبري له سيمه ييزو پوليسو څخه کلک ملاتړ کوي څو د امنيت په ټينګښت کې مهم رول ولوبوي.))

د اړوندې موضوع په اړه د پکتيکا مرستيال والي شېر بادشاه اورګوني پژواک ته وويل چې د سيمه ييزو پوليسو ترڅنګ سيمه ييزې اردو هم ښه نتيجه ورکړې ده.

ده وويل چې د سيمه ييزو پوليسو د يادو ستونزو په اړه په ولايت او مرکز کې له اړوندو چارواکو سره خبرې کوي څو حل شي.

login or register a new account.