نړۍ کې د کرونا ویروس ثبت شوې پېښې له ۵۳ میلیونو واوښتې

کابل (پژواک، ۲۴ لړم ٩٩): په نړۍ کې د کوویډ – ۱۹ ناروغۍ ثبت شوې شمېرې تر ۵۳ میلیون واوښتې او تر اوسه له دې ډلې تر یو عشاریه درې میلیونه ډېر کسان مړه شوي او له ۳۴ میلیونو ډېر روغ شوي دي.

د کرونا ويروس چې شاوخوا يوولس مياشتې مخکې لومړى د چين په اووهان ښار کې خپور شو، وروسته د نړۍ شاوخوا ۲١۰ هېوادونو او سیمو ته ورسېد. دغه ویروس اوس په ډېرو هېوادونو کې کنټرول شوى، خو په ځينو کې يې دويمه څپه پيل شوې ده.

د امريکا د جان هاپکنز پوهنتون د معلوماتو له مخې، تر نن غرمې پورې په ټوله نړۍ کې د کرونا ناروغۍ د ثبت شویو پېښو شمېر ۵۳ میلیونه، ۲۸۴ زره او ۸۶۷ کسانو ته رسېدلى دى.

د سرچینې د معلوماتو له مخې، تر اوسه نړۍ کې څه باندې ۳۴ ميليونه پر کرونا اخته کسان بېرته روغ شوي، خو يو ميليون، ۳۰۱ زره او ۵۴ کسان مړه شوي دي.

 سرچینه زیاتوي چې روسيه، کولمبيا، مکسيکو، سوېلي افريقا، هسپانیه، ارجنټاين، چيلي، برېتانیا، ایټالیا، جرمني، ایران، ترکیه او پیرو هغه هېوادونه دي چې په کې د کرونا د ناروغانو او مړو شمېر ډېر دی.

د افغانستان د عامې روغتیا وزارت د معلوماتو له مخې، دغه هېواد کې تر اوسه ۴۳ زره او ۳۵ کسان پر کووېډ – ۱۹ ناروغۍ اخته شوي او له دغې ډلې ۱۶۰۵ کسان مړه او ۳۵ زره او ۶۳ کسان بېرته روغ شوي دي.