د سالنګ لویه لار د ټېلر موټرو پر مخ وتړل شوه

چاریکار (پژواک، ۲ لېندۍ ۹۹): د سالنګونو د ساتنې او څارنې مسوولین وايي چې د سالنګ لویه لار د واورې اورېدو او یخک له امله د ټېلري موټرو پر مخ وتړل شوه.

د سالنګونو د ساتنې او څارنې اجرائیو مدیر سميع الله رحیمي پژواک خبري اژانس ته وویل چې ټېلر موټر دې د سالنګ پر لور له حرکته ډډه وکړي.

هغه زیاته کړه: «د سالنګ لویه لار نن (یکشنبې د لېندۍ دویمه» د سهار نهه بجې د ټېلر موټرو پر مخ تړل شوې ده.،»

د هغه په وینا، د سالنګونو د ساتنې او څارنې ریاست د هوا پېژندنې ادارې په راتلونکو ۴۸ ساعتونو کې د واورې اورېدو وړاندوینه کړې ده.

یاده سرچینه وایي چې په دې وخت کې به له ټېلري موټرو پرته په وسایلو مجهز نور مسافر وړونکي موټر د سالنګ له لویې لارې تګ راتګ کوي.

Views: 1