جلال اباد (پژواک، ۱۱ لېندۍ ۹۹): د ننګرهار په بهسودو ولسوالۍ کې د ناپېژاندو وسله والو له لوري يو پخوانی جهادي قوماندان او قومي مشر وژل شوى دی.
چارواکي وايي، نوموړی له خپل کور څخه موټر کې جلال اباد ښار ته پر لاره و چې د وسله والو تر بريد لاندې راغلی دی.
د ننګرهار د والي وياند عطاء الله خوږياڼي د لېندۍ په ۱۱مه پژواک اژانس ته وويل چې پر قومي مشر او پخواني جهادي شخصيت زلمي باندې نن شاوخوا درې بجې د بهسودو ولسوالۍ اړوند د هډې فارم په سيمه کې ناپېژاندو وسله والو کسانو ډزې کړې دي.
هغه وايي، زلمی له کوره ښار ته په خپل موټر کې د حرکت په حال کې و چې وسله والو پرې ډزې کړي او ځای پر ځای يې وژلی دی.
د هغه د معلوماتو له مخې، امنيتي ځواکونه سيمې ته رسېدلي، ساحه يې کنټرول کړې او د وسله والو د نيولو هڅې يې پيل کړې دي.
د پېښې يو عيني شاهد غلام الله پژواک ته وويل، موټر د لارې پر سر روان و چې وسله والو پرې ډزې وکړې او په کې سپور کس يې ځای پر ځای وواژه.
هغه زياته کړه، د موټر چلوونکی نه پېژني خو موټر يې د بريد پرمهال د سړک خوا کې لويې ويالې ته پرېوتی دی.
د دغې پېښې مسووليت تر اوسه کومې وسله والې ډلې نه دی منلی.
Views: 28
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن