ولسمشر اشرف غني کندهار ته رسېدلى

کندهار (پژواک، ٢٧ لېندۍ ٩٩) : ولسمشر اشرف غني له يوه لوړ پوړي پلاوي سره نن سهار کندهار ولايت ته رسېدلى دى.

د کندهار د والي وياند بهير احمد د لېندۍ په ٢٧مه،پژواک خبري اژانس ته وويل چې له ولسمشر اشرف غني سره په دغه سفر کې لومړى مرستيال امر الله صالح ، د کابينې غړي او امنيتي مسوولين ملتيا کوي.

هغه زياته کړه، ولسمشر به د کندهار له والي حيات الله حيات او ځايي امنيتي مسوولينو سره د دغه ولايت د وروستيو امنيتي حالاتو په اړه خبرې وکړي.

احمدي دغه راز وويل چې ولسمشر اشرف غني به د دغه ولايت له بېلا بېلو نورو خلکو سره هم ځانګړې ليدنې ولري.

ولسمشر اشرف غني په داسې حال کې کندهار ولايت ته تللى، چې په دې وروستيو کې کندهار ښار ته په نږدې ولسواليو، ارغنداب، ژېړۍ او پنجوايي کې پراخه جګړې شوې دي.

Views: 2