پکتيکا کې د ګازنیونې له امله دوه کسان مړه شوي

ښرنه (پژواک، ٣ مرغومى ٩٩): د پکتيکا په يوسف خېلو ولسوالۍ کې د ګازنیونې له امله دوه کسان مړه شوي او يوه مېرمن د کوما په حالت کې ده.

د پکتيکا امنيې قوماندانۍ مرستيال وياند لعل محمد اميري پژواک خبري اژانس ته وويل چې تېره شپه د دغه ولایت په يوسف خېلو ولسوالۍ کې په يوه کور کې يو پلار او زوى ګاز نیولي او مړه شوي او د همدې سړي مېرمن د کوما په حالت کې ده.

دغه راز د ښرنې په ملکي روغتون کې يوې سرچينې هم پژواک ته وويل چې له يادې پېښې دوه جسدونه او يوه مېرمن د کوما حالت کې ور وړل شوي دي.

د يادونې ده، څو مياشتې مخکې هم په پکتيکا کې د ګازنیونې له امله د يوې کورنۍ دوه ماشومان، دوه ښځې او يوه نارينه مړه شوي وو.