کابل (پژواک، ۸ مرغومی ۹۹): پولیس وایي چې په کابل ښار کې د ملي اردو پر موټر چاودنه شوې خو مرګ ژوبله نه لري، خو عيني شاهدان بیا په دې پېښه کې د درېیو کسانو له ټپي کېدو خبر ورکوي.
د کابل ولایت د امنیې قوماندانۍ ویاند فردوس فرامرز د دې پېښې د تایید ترڅنګ پژواک ته وویل چې یاده چاودنه نن سهار اووه بجې او ۵۰ دقیقې د کابل ښار د کلوله پشتې ساحه کې د ملي اردو پر یوه رینجر موټر شوې ده.
فرامرز وایي چې په دې پیښه کې چا ته زیان نه دی رسېدلی.
خو د پېښې عیني شاهدان وایي چې په چاودنه کې لږ تر لږه درې کسان ټپیان شوي دي.
تر اوسه هیڅ یوې ډلې د دې چاودنې مسوولیت پر غاړه نه دی اخیستی.
دا په داسې حال کې ده چی په دې وروستیو کې د کابل ښار مربوطاتو کې ناامنۍ، په ځانګړي ډول هدفي وژنې او چاودنې ډېرې شوې دي چې دغه کار د کابل ښاریان اندېښمن کړي دي.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن