کابل (پژواک، ٢٣ مرغومى ٩٩) : په خیبرپښتونخوا کې د افغانستان لوی قونسل جنرال نجیب الله احمدزي د دغه ايالت له مسوولينو غوښتي چې په تورخم کې دې يواځې له مشکوکو ناروغانو څخه د کرونا تيسټ وغوښتل شي.
له تېرې مياشتې راهيسې چې پاکستان د تورخم لاره د مسافرينو پر مخ پرانېستله، د کرونا ټيسټ درلودل يې هم لازمي کړي چې له امله يې افغان مسافرين له ستونزو سره مخامخ شوي دي.
مسافرينو څو ورځې مخکې پژواک اژانس ته ويلي وو، چې د کرونا ټيسټ غوښتل کېږي، خو هلته واټن نه مراعت کېږي.
په پېښور کې د افغان قونسلګرۍ له خوا په يوه خپره شوې خبرپاڼه کې راغلي، چې افغان قونسل جنرال نجيب الله احمدزي له يوه پلاوي سره د پښتونخوا له روغتيا وزير تیمورخان جګړا سره په همدې موخه وليدل.
سرچينې زياته کړې چې د دې ليدنې پر مهال احمدزي له جګړا وغوښتل چې په تورخم کې دې يواځې له هغو کسانو د کرونا ټیست وغوښتل شوي چې شکمن وي .
دغه راز احمدزي له مقابل لوري څخه افغان کډوالو ته د (صحت انصاف ) روغتيايي کارت ورکول، هغه افغانان چې د درملنې لپاره پاکستان ته راځي د هغوى لپاره د پاکستان په دولتي روغتونونو کې لازمې اسانتياوې برابرول او د طب افغان محصلینو ته د سیتاژ لپاره د پاکستان په دولتي روغتونونو کې چانس غوښتنه وکړه.
په خبرپاڼه کې راغلي، د خيبر پښتونخوا د روغتيا ايالتي وزير تیمور خان جګړا وويل چې په تورخم کې به د کرونا ټيست په هکله جدي غور وشي او په نږدې راتلوونکې کې به يواځې د شکمنو کسانو د کرونا ټيست په اسانۍ او په کم وخت کې په تورخم کې ترسره کيږي.
هغه زياته کړه، چې ټولو افغان ناروغانو ته به په تورخم او د پاکستان په دولتي روغتونونو کې د ځايي خلکو په څېر لازمې اسانتياوې ورکول کیږی.
جګړا ويلي چې د افغان سیتاژ دورې محصلینو لپاره به ځانګړې سهميه ورکول شي.
Visits: 147
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن