لښکرګاه (پژواک، ٢ سلواغه ٩٩): د ملي دفاع وزارت وايي چې کومانډو ځواکونو د هلمند په نهرسراج ولسوالۍ کې د طالبانو له زندان څخه ٢٧ کسان ازاد کړي دي.
دغه څرګندونې په هغې خبرپاڼې کې شوي چې د سلواغې په دويمه د ملي دفاع وزارت د مطبوعاتي دفتر له لوري پژواک خبري اژانس ته رالېږل شوې ده.
په خبرپاڼه کې راغلي چې کومانډو ځواکونو تېره شپه د هلمند په نهرسراج ولسوالۍ کې د طالبانو پر يوه زندان عمليات کړي دي.
سرچينه وايي چې د يادو عملياتو په ترڅ کې د ٢٦ ملکي وګړو په ګډون ٢٧ کسان د طالبانو له زندان څخه ازاد کړاى شوي دي.
په خبرپاڼه کې راغلي: ((طالبانو له يادو کسانو سره تاوتريخوالى کړى او د ټولو اصولو خلاف يې ورسره چلند کړى دى.))
سرچينه زياتوي چې د عملياتو پرمهال د زندان يو ساتونکى وژل شوى او يو شمېر وسلې او مهمات يې د امنيتي ځواکونو لاسته ورغلي دي.
خو د نهرسراج ولسوال فضل باري فياض بيا د يادو عملياتو په اړه بې خبري ښي.
بل لورته وسله والو طالبانو تر اوسه په دې اړه څه نه دي ويلي.
Views: 49
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن