کندهار (پژواک، ۱۸ سلواغه ۹۹): د کندهار والي وايي، د دغه ولایت د نساجي- نخي او نساجي- پشمي فابریکو بیا فعالولو لپاره په ولایتي او مرکزي کچه هڅې کوي.
والي روح الله خانزاده د ښار جوړولو له وزیر محمود کرزي او یو شمېر سوداګرو سره یو ځای دغه څرګندونې د یادو فابریکو د ودانیو او مشینرۍ د لیدلو پر مهال وکړې چې له تېرو څو لیسزو راهیسې یې د بېلابېلو ستونزو له امله فعالیت په ټپه ولاړ دی.
خانزاده وویل، د بې کارۍ کچې ټیټول یې له کاري لومړیتوبونو دي او په دې لړ کې له ټولو هغو فرصتونو او امکاناتو کار اخلي چې خلکو ته په کې د کار او روزګاز زمینه برابرېږي.
هغه زیاته کړه، په ولایتي او مرکزي کچه هڅه کوي د کندهار نخي او پشمي فابریکې بیا فعالې کړي څو هم خلکو ته کار پیدا شي او هم کورنی تولید او صنعت وده وکړي.
نوموړي په دې برخه کې د ښار جوړولو له وزیر محمود کرزي هم د مرستې غوښتنه وکړه.
دواړو مسوولینو هوډ وکړ چې د یادو فابریکو د فعالولو لپاره به له ټولو امکاناتو کار اخلي چې وار له مخه ورباندې ۵۰ میلیونه ډالر پانګونه شوې ده.
د دوی په وینا، په دې برخه کې به ډېر ژر د کندهار د اوسېدونکو لپاره لوی زېری ولري.
یاد چارواکي داسې مهال د کندهار د نخي او پشمي فابریکو بیا فعالولو په موخه د هڅو پیلولو خبر ورکوي چې دوه میاشتې وړاندې د صنعت او سوداګرۍ وزیر نثار احمد غوریاني په یوه غونډه کې د دغو فابریکو د بیا فعاله کېدو او مډرنیزه کېدو په اړه خبرې کړې وې.
غوریاني په دې غونډه کې د دولتي تصدیو پر بیا فعاله کېدو ټینګار کړی و او ویلي یې و چې د کندهار د نخ او پشم اوبدلو فابریکې باید بیا فعالې او په نوو ماشینونو سنبالې شي.
د ده په خبره، د کندهار د نخ اوبدلو او نخي ټوکر د تولید فابریکه یو مهال په هېواد کې لویه تصدي ګڼله کېدله او اوس د سوداګرۍ وزارت هڅه کوي یو ځل بیا دغه فابریکه فعاله کړي.
د کندهار د نساجي تصدۍ د معلوماتو له مخې، نخي نساجي فابریکې په ۱۹۷۸ زېږدیز کال کي فعالیت پیل کړ چې له کاله یې ۴۰ میلیونه متره ټوکر او ۷ زره ټنه تار تولیدوه.
د دې فابریکې لپاره خام مواد وطني پنبه وه او په درې شفټه کې یې ۵ زره کارګر درلودل.
دا فابریکه له ۱۳۸۱ تر ۱۳۸۷ قسمي فعاله وه، خو وروسته د جګړو، بودجې نه شتون او نورو ستونزو له درېدلې ده.
په ورته توګه د نخي پشمي فابریکې بیا په ۱۹۷۹ زېږدیز کال کې په فعالیت پیل وکړ چې له کاله یې په درې شفټه کې یو میلیون متره د کمپلو، بالاپوښونو او دریشیو لپاره ټوکر تولیداوه او ۵۰۰ ټنه یې د غالیو او جاکټونو لپاره تار تولیداوه.
د دې فابریکې لپاره خام مواد وطني وړۍ وه، زرو تنو په کې کار کاوه چې له ۱۳۷۱ تر ۱۳۸۷ کلونو پورې فعاله وه خو وروسته د ورته ستونزو له امله د دې فابریکې فعالیت هم درېدلی دی.
د کندهار اوسېدونکي هم له تېرو څو کلونو راهیسې د دغو فابریکو د بیا فعالولو غوښتونکي دي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن