کابل (پژواک، ۲۴ سلواغه ۹۹): په کابل کې د امریکا سفارت له کرونا سره د مبارزې لپاره د ځانګړې شوې بودجې لګښت کې د فساد پر شتون اندېښنه څرګنده کړې او له افغان چارواکو یې غوښتي چې فساد ودروي.
د امریکا سفارت نن (جمعه، د سلواغې ۲۴مه) په خپله ټویټرپاڼه کې لیکلي چې لسګونه افغان چارواکي له کرونا سره د مبارزې لپاره له ځانګړې شوې بودجې د ناسمې استفادې په تړاو څارنوالۍ ته معرفي شوي دي.
په کابل کې د امریکا سفارت لیکلي: ((له قانونه یادو سرغړونو افغانان نه یوازې له مالي اړخه زیانمن کړي، بلکې روغتیايي او حیاتي اسانتیاوو ته د هغوی لاسرسی یې هم له ځنډ سره مخ کړی. فساد ودروئ!))
دا په داسې حال کې ده چې په هېواد کې له کرونا سره د مبارزې لپاره په ځانګړې شوو پیسو کې د فساد ډېر راپورونه خپاره شوي دي.
