جلال اباد کې په دوو هدفي بريدونو کې څلور کسان وژل شوي

جلال اباد (پژواک، ۲۸ سلواغه ۹۹): د ننګرهار مرکز جلال اباد ښار کې د دوو هدفي بريدونو په ترڅ کې څلور کسان وژل شوي او دوه نور ټپيان دي.

ناپېژاندو وسله والو دغه بريدونه پر پوليسو او عامو خلکو کړي دي.

د ننګرهار ولايت يوې امنيتي سرچينې د نوم نه خپرولو په شرط پژواک اژانس ته وويل، نن سهار ۷ بجې او ۴۰ دقيقې د جلال اباد ښار د درېيمې ناحيې اړوند ارزاقو کوڅه کې د پوليسو پر رېنجر باندې وسله والو کسانو ډزې کړي، يو پوليس وژل شوى او دوه تنه ټپيان دي.

سرچېنې زياته کړه، تر دغې پېښې وروسته د ۸ بجو په شاوخوا کې د جلال اباد ښار د درېيمې ناحيې اړوند نصرت لېسې ته نږدې ناپېژاندو وسله والو چې ريکشا کې ناست وو، پر ټوډي موټر باندې ډزې کړي، چې درې کسان په کې وژل شوي دي.

سرچينې د دغو کسانو د هويت په تړاو څه نه دي ويلي، خو يوې بلې سرچينې پژواک ته وويل چې موټر د کرنې او مالدارۍ خونې د مشر انجنير قاسم يوسفي دی چې خپله موټر کې نه و او زوی يې له دوو نورو کسانو سره په موټر کې موجود و.

د ننګرهار د امنيه قوماندانۍ وياند فريد خان يادې پېښې تاييد کړې، خو په دې تړاو يې ډېر معلومات ورنه کړل.

د جلال اباد د حوزوي روغتون وياند ګلزاده سنګر وايي، د جلال اباد له دوو پېښو څخه څلور جسدونه او دوه ټپيان روغتون ته وړل شوي دي.

د پېښو مسوليت چا نه دی منلی.