پل علم (پژواک، ٣ کب ٩٩): د لوګر سيمه ييزو مسوولين وايي چې وسله والو طالبانو په دغه ولايت کې د ملي دسترخوان توکو پر وېش بنديز لګولى او هم يې د دغه پروګرام يو شمېر کسان وهلي دي.
د لوګر د والي وياند ديدار لونګ د کب په درېيمه پژواک خبري اژانس ته وويل چې له څه مودې راهيسې طالبان په کليو او بانډو کې د ملي دسترخوان مرستې پر وېش کلک بنديز لګولى دى.
هغه وايي: ((حکومت دغه برنامه شروع کړه، څو له بېوزلو سره مرسته وکړي خو طالبانو يې مخه نيولې او د دې برنامې تطبيق ته اجازه نه ورکوي.))
په دې اړه د لوګر د مرکز کلنګار سيمې پراختيايي شورا يوه غړي د نوم نه اخیستو په شرط پژواک ته وويل چې څه موده وړاندې د دوى کلي ته د کليو پراختيا رياست له لوري د ملي دسترخوان برنامې په چوکاټ کې ځيني توکي د وېشلو لپاره راوړل شوي وو.
ده زياته کړه: ((دغه مواد د بېوزلو کسانو لپاره راوړل شوي وو، خو طالبان راغلل د وېشلو مخه يې ونيوه او هم يې دغه مواد نامعلوم ځاى ته انتقال کړي دي.))
دغه راز د محمداغې ولسوالۍ د دهنو سيمې پراختيايي شورا غړي عبادالله پژواک ته وويل چې د دوى په سيمه کې هم طالبانو د ملي دسترخوان د توکو د وېش مخه نیولې ده.
د هغه په وينا، طالبانو د دوى د سيمې ټولو شوراګانو او قومي مشرانو ته ګواښ کړى چې د ملي دسترخوان توکي به پر خلکو نه وېشي.
دى وايي: ((زموږ د کلي مواد اوس هم په ولايت کې دي، څوک يې د راوړلو جرئت نه لري.))
بل لور ته پژواک خبري اژانس د هغه مکتوب کاپي هم ترلاسه کړې چې په دې اړه د لوګر ولايت مقام له لوري د ملي امنيت رياست ته استول شوې ده.
په دغه مکتوب کې راغلي چې طالبانو په ټولو کليو او بانډو کې د ملي دسترخوان توکو د وېش مخه نیولې او د پراختيايي شوراګانو غړي يې ګواښلي چې دغه مواد به نه توزيع کوي.
په ياد مکتوب کې د څو کليو يادونه شوې چې د ځينو مواد يې طالبانو له ځان سره وړي او د ځينو نورو يې بيا مواد په کلي کې دي خو د وېشلو اجازه نه ورکول کېږي.
په مکتوب کې د ملي امنيت له رياسته غوښتنه شوې چې په دې برخه کې اصولي اجراات وکړي.
خو ملي امنيت تر اوسه په دې اړه څه نه دي ويلي.
د اړوندې موضوع په اړه د طالبانو وياند ذبيح الله مجاهد پژواک ته وويل، په هره پروژه کې چې د فساد احتمال شتون ولري، طالبان يې مخه نيسي.
دى زياتوي: ((په هر هغه کار او پروژه کې چې شفافيت نه وي او د کابل ادارې د مسوولينو او چارواکو له لوري د غلا، چور او اختلاس احتمال وي، موږ هغه پروژې او پروګرام ته اجازه نه ورکوو.))
د مجاهد په وينا، طالبانو په دې برخه کې د روڼتيا غوښتنه کړې خو حکومت تر اوسه په دې اړه څه نه دي وړاندې کړي.
د يادونې ده، په افغانستان کې د کرونا ويروس له خپرېدو وروسته له بېوزلو کسانو سره د مرستې په موخه حکومت د ملي دسترخوان برنامه پيل کړه.
د خپرو شوو معلوماتو له مخې، په دې برنامه کې له پنځه ميليونو کسانو سره د خوراکي توکو مرسته کېږي چې ټوليز لګښت يې شاوخوا ٢٨٠ ميليونه ډالر اټکل شوى دى.
Views: 496
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن