کابل (پژواک، ۵ حوت ۹۹): افغانستان کې د کرونا ویروس واکسین د تطبیق لړۍ نن له کابله پیل شوه او ولسمشر غني په دې اړه نیول شوو مراسمو کې د دغه واکسین پر عادلانه وېش ټینګار وکړ.
افغانستان کې د کرونا ویروس لومړنۍ پېښه د تېر کال کب میاشتې په ۲۵مه ثبت شوه او تر اوسه د دې ناروغۍ ۵۵۶۴۶ مثبتې پېښې ثبت شوې او له دې ډلې ۲۴۳۵ کسان مړه او ۴۸۸۹۵ نور بېرته روغ شوي دي.
د روان کال د سلواغې په ۱۹مه د هند له خوا مرسته شوي د کرونا ویروس ۵۰۰زره دوزه واکسین کابل ته را رسېدلی دی.
د دغه واکسین د تطبیق لړۍ چې د عامې روغتیا وزارت په خبره، په تطبیق کې به یې لومړیتوب روغتیایي کارکوونکو، امنیتي ځواکونو او د رسنیو کارکوونکو ته ورکړل شي- نن په کابل کې پیل شوه.
د عامې روغتیا وزارت وایي، دغه لړۍ وروسته له هغه پیل شوه چې یاد واکسین د روغتیا نړیوال سازمان له خوا تایید شو.
نن یوې خبریالې او د امنیتي ځواکونو درېیو کسانو ته یاد واکسین ولګول شول.
ولسمشر محمد اشرف غني په دې اړه نیول شوو مراسمو کې وویل چې لومړی امنیتي ځواکونو ته د واکسین تطبیق، له دغو ځواکونو سره د حکومت او ملت د ژمنتیا نښه ده.
هغه وویل، ټولو روغتیایي چارواکو ته دنده ورکړل شوې چې دغه واکسین په عادلانه توګه تطبیق کړي.
ده له کرونا ویروس سره د روغتیایي کارکوونکو مبارزه وستایله، ویې ویل چې روغتیایي کارکوونکي رښتینې اتلان دي او هغوی ثابته کړه چې د امنیتي ځواکونو په شان له ګواښه نه وېریږي.
د ده په وینا، د هغو روغتیاپالانو او ډاکترانو نومونه به په یوه څلي ولیکل شي چې د کرونا ویروس له امله یې ژوند بایللی.
ولسمشر همدا راز وویل چې اوس هم په هېواد کې د کرونا ویروس ګواښونه شته او د دغه ویروس نوي ډولونه د خپرېدو په حال کې دي.
هغه له ټولو خلکو وغوښتل چې د عامې روغتیا وزارت لارښوونو ته پام وکړي.
د عامې روغتیا وزارت سرپرست وزیر ډاکتر وحید مجروح په نننۍ غونډه کې وویل، افغانستان وکولی شو چې د نورو پر مخ تللو هېوادونو په شان له کرونا ویروس سره مبارزه په ښه ډول مدیریت کړي.
د عامې روغتیا وزارت د تېرې (سلواغې) میاشتې په ۲۳مه د کرونا ویروس واکسین د تطبیق کولو د پلان له تصویبه خبر ورکړ، ویې ویل چې د هند له یاد ۵۰۰زره دوزه واکسین سربېره به په نږدې راتلونکي کې ۱.۳ میلیون دوزه نور واکسین هم هېواد ته راوړل شي او دغه لړۍ به روانه وي.
Views: 84
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن