ننګرهار کې چاودنې پنځه پوليس ټپيان کړل

جلال اباد (پژواک، ۶ کب ۹۹): د ننګرهار مرکز جلال اباد ښار کې د پوليسو په رېنجر موټر د سړک غاړې ماين چاودنه کې پنځه سرتېري ټپيان شوي دي.

چارواکي وايي، د چاودنې ځای کې بل ماين هم ځای پر ځای شوی و، خو پوليسو کشف او چاودنه يې ورکړې ده.

د ننګرهار د امنيه قوماندانۍ وياند فريد خان د کب په ۶مه پژواک اژانس ته وويل، نن مازيګر شاوخوا څلور بجې د جلال اباد ښار د لومړۍ ناحيې اړوند بهسودو پول ته څېرمه د موټر شويانو سيمه کې د پوليسو په يو رېنجر موټر د سړک غاړې ماين چاودنه شوې ده.

هغه زياته کړه، د چاودنې له امله درې پوليس سرتېري ټپيان او موټر هم تخريب شوی دی.

بلخوا د جلال اباد د حوزوي روغتون وياند ګلزاده سنګر پژواک اژانس ته وويل، د چاودنې له ځايه ورته پنځه ټپيان ور وړل شوي چې ټول نظاميان دي.

د ده په وینا، د يو ټپي روغتيايي حالت د اندېښنې وړ دی.

د پېښې يوه عيني شاهد ميرويس پژواک ته وويل چې سيمه کې يې د دوو چاودنو غږونه اورېدلي دي.

د ننګرهار د قوماندانۍ وياند وايي چې دويمه چاودنه په سيمه کې د ځای پر ځای شوي ماين وه چې پوليسو کشف کړی و.

د چاودنې مسووليت چا نه دی منلی.