ګردېز (پژواک، ٧ کب ۹۹): د پکتيا ولايت اوسېدونکي د سولې په خبرو کې ځنډ او بې پايلې اوږدېدل يې د اندېښنې وړ بولي او ټينګار کوي چې په دې برخه کې دې له رښتيني جديت څخه کار واخيستل شي.
دوی په يوه خبري کنفرانس کې د سولې د خبرو لپاره د ټولو افغان سياسيونو پر یو کېدو سربېره له ملګرو ملتونو او نړيوالې ټولنې هم په دې برخه کې د واقعي فعال رول تر سره کولو غوښتنه وکړه.
د پکتيا متحدې شورا مشر حفيظ الله مبارز له تېرو څو مياشتو راهيسې د سولې د خبرو بې پايلې اوږدېدل د توجيه وړ نه بولي او په دې مهمه ملي مسئله کې پر رښتينولي ټينګار کوي.
مبارز وويل: ((افغانستان کې له څو لسيزو راهيسې جګړې روانې دي او نور بايد په هېڅ ډول دوام و نه کړي. د افغانستان اسلامي جمهوريت او د وسله والو طالبانو تر منځ د سولې مخامخ خبرو پیلېدو ته هيلې پيدا شوې وې، خو متاسفانه له خبرو سره هم مهاله د جګړو زياتېدو پر دې خبرو د افغانانو باور ډېر کم کړی.))
مدني فعال کرامت الله کرامت نيوکه وکړه چې وسله وال طالبان د وطن د پرمختګ او خلکو د هوساينې لپاره پروګرامونه نه لري او د داسې موخې په نوم کورنۍ جګړې ته دوام ورکوي، چې تعريفولای يې نه شي.
کرامت وايي: ((دلته نور پردۍ طرحې نه شي پلې کېدی، که هغه د مؤقت حکومت خبره وي او که په بل نوم او جريان وي.))
ديني عالم عبدالعزيز احمدي وويل چې د روانې جګړې ټول مادي او معنوي زيان مسلمان ملت ته اوړي او افغانان نور د خپلو خپلوانو جنازو ته د اوږې ورکولو توان نه لري.
احمدي وايي: ((سوله الهي امر دی او د حصول لپاره یې بايد پوره کوشـش وشي. د سولې له ادبياتو دې کار واخيستل شي.))
د جګړې يو تن قرباني اصغر ځاځی وايي چې په جګړه کې خپله په دواړو پښو معلول شوی او د کورنۍ درې غړي يې قرباني شوي او له وسله والو طالبانو غواړي چې د اوربند په کولو د نورو افغانانو د ژوند د تباه کېدو مخنيوی وکړي.
د دغه خبري کنفرانس تنظميوونکي سيدجمال الدين اصف خېل وويل چې وسله وال طالبان دې له اوربند څخه وېره نه لري او مطلوبې پايلې ته د رسېدو لپاره دې سرتاسري اوربند وکړي.
اصف خېل وويل: ((اوربند اساس دی او بايد عاجل جګړه ودرول شي. ملګري ملتونه، نړيواله ټولنه او اسلامي هېوادونه بايد زيات جدي او ښکېل شي. دلته د يوه ملت بربادي روانه او دنياوال بايد بې تفاوته پاتې نه شي.))
د يادونې ده چې له شاوخوا دوو کلونو راهيسې د قطر هېواد په دوحې ښار کې د افغان سولې په تړاو لومړى د امريکا او طالبانو او بياافغان دولت او طالبانو ترمنځ خبرې روانې دي خو تر اوسه مطلوبې پايلې ته نه دي رسېدلي.
