پاکستان د افغان سولې په تړاو د امريکا د نويو هڅو هرکلى وکړ

کابل (پژواک، ٢٢ کب ٩٩) : د پاکستان د بهرنيو چارو وزارت د افغان سولې په تړاو د امريکا د نويو هڅو هرکلى کړى دى.

د امريکا د بهرنيو چارو وزارت څو ورځې مخکې د افغان سولې په تړاو د يوه ټولشموله انتقالي حکومت جوړولو ترڅنګ يو شمېر وړانديزونه کړي دي.

په دې وړانديزونو کې د ملګرو ملتونو د رول زياتول  او د سولې په تړاو په ترکيه کې ديوې غونډې جوړول هم شامل دي.

د امريکا ځانګړي استازي زلمي خليلزاد دغه نوې طرحه په کابل کې له افغان مشرانو، په دوحه کې له طالب استازو او په پاکستان کې د پوځ له مشر جنرال باجوه سره شريک کړې ده.

د پاکستان د بهرنيو چارو وزارت وياند زاهد حفيظ چوهدري پرون په اسلام اباد کې د يوې خبري غونډې پر مهال د امريکا د نوې طرحې هرکلى وکړ.

هغه زياته کړه : (( پاکستان د افغان شخړې د هواري لپاره د سيمه ييزې ښکېلتيا ملاتړ کوي، خو د دې پروسې د ګډوډونکو د رول په اړه بايد محتاط واوسو.))

د نوموړي په وينا، هندوستان په افغان سولې پروسه کې رغنده همکار نه دى.

د پاکستان د بهرنيو چارو وزارت وياند وويل چې تر اوسه دوى د ترکيې د ناستې په اړه کومه رسمي بلنه نه ده ترلاسه کړې.

هغه زياته کړه، ټول افغان خواوې بايد د افغانانو په مشرۍ د سولې پروسې د چټکتيا لپاره مذاکراتو ته ادامه ورکړي ، څو په دغه هېواد کې د شخړې سياسي هواري ته لاره هواره شي.