د کابل ښار غبرګو چاودنو ۱۵ کسانو ته مرګ ژوبله واړوله

کابل (پژواک, ۲۴ کب ۹۹) : د کابل پولیس وایي چې په دوو چاودنو کې درې کسان وژل شوي او ۱۲ نور ټپیان دي.
د کابل د پولیسو ویاند فردوس فرامرز د کب په ۲۴ مه, پژواک اژانس ته وویل چې دغه چاودنې نن ماښام مهال د درېيمې اوشپږمې امنیتي حوزو په مربوطاتو کې شوې دي.
هغه زیاته کړه چې دا چاودنې د درېیمې حوزې ګولاي دواخانه او د شپږمې حوزې سر کاریز سیمو کې پر تونس موټرو شوې دي.
فرامرز وایي چې په دواړو چاودنو کې درې کسان وژل شوي او ۱۲ نور ټپیان دي .
ده وویل چې ټپیان روغتونونو ته وړل شوي, خو د مړو او ټپیانو هویت یې په ډاګه نه کړ.
د دغو چاودنو مسوولیت چا نه دی منلی.
د یادونې ده چې ترڅو ورځني ځنډ وروسته په کابل ښار کې دغه چاودنې وشوې.