زرنج (پژواک، ٤ ورى ١٤٠٠): د نیمروز په چاربرجک ولسوالۍ کې جوړ شوى کمال خان اوبو بند د ولسمشر محمد اشرف غني له خوا پرانیستل شو.
په دغو مراسمو کې د ولسمشر لومړي مرستيال امرالله صالح، دويم مرستيال سرور دانش، د کابينې غړو، د ملي شورا غړو او د نيمروز ولايت ځايي چارواکو او قومي مشرانو برخه اخيستې وه.
ولسمشر اشرف غني له لوړ پوړي پلاوي سره نن سهار نيمروز ولايت ته ورسېد او بيا نېغ په نېغه چاربرجک ولسوالۍ ته ولاړ او له غرمې مخکې يې د کمال خان بند پرانيست.
د بند له پرانيستلو وروسته ولسمشر او د هغه مرستيالانو د کمال خان بند د خاطراتو په کتابچه کې خپل خاطرات وليکل.
د کمال خان اوبو بند د نیمروز په چاربرچک ولسوالۍ کې موقعیت لري او په ۱۳۴۵ لمريز کال کې د جوړولو کار پیل شوی و. خو د نا امنیو او ځینو نورو لاملونو او سیاسي تحولاتو له امله یې د جوړولو کارونه ځنډېدلي وو.
کمال خان بند په هرات کې د سلما او فراه کې د بخش اباد ترڅنګ د افغانستان په لوېدیځ کې د اوبو له لویو بندونو شمېرل کېږي.
د دولتي چارواکو په وینا، د کمال خان یاد بند په جوړېدو سره به ۸۰زره هکتاره ځمکه خړوبه او ۹ میګاواټه برېښنا به تولید کړي.
دغه بند ګاونډي هېواد ایران ته د هلمند سیند پر بهېدونکو اوبو جوړ شوی دی.
په دې اړه به نور جزئيات وروسته خپور شي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن