کابل (پژواک، ٦ ورى ١٤٠٠) : ځايي چارواکي وايي چې پر کونړ ولايت د پاکستانيو ځواکونو په بريدونو کې يو تن وژل شوى او دوه نور ټپيان دي.
د کونړ والي اقبال سعيد د وري په ٦مه، پژواک خبري اژانس ته وويل چې پرون پاکستانيو ځواکونو د دې ولايت پر سرکاڼو ولسوالۍ ١٦ توغندي توغولي وو.
هغه زياته کړه، په دې بريدونو کې يو ځوان وژل شوى او دوه نور کسان ټپيان دي.
بلخوا د کونړ له امنيه قوماندانۍ څخه په يوه خپره شوې خبرپاڼه کې راغلي چې دا توغندي د سرکاڼو ولسوالۍ د ګلاپړي درې او سپيرو غونډو پر سيمو لګېدلي دي.
په ولسي جرګې کې د کونړ د خلکو استازي جاوېد ساپي د دې بريدونو د غندلو ترڅنګ ويلي چې افغان ځواکونو ځوابي بريدونه کړي دي.
د يادونې ده، چې له تېرو څو کلونو راهيسې پاکستاني ځواکونه پر کونړ ولايت بريدونه کوي چې له امله يې سلګونو کسانو ته مرګ ژوبله اوښتې ده.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن