مزارشريف کې د يوې لویې چاودنې مخه نیول شوې ده

مزار شريف (پژواک، ٣١ ورى ١٤٠٠): د بلخ ولايت امنيې قوماندانۍ پولیس وایي چې په مزارشریف ښار کې یې د یوې لویې چاودنې مخه نیولې ده.

د بلخ پولیسو مطبوعاتي مسوول عادل شاه عادل د وري په ٣١مه پژواک اژانس ته وويل چې وسله والو مخالفينو په یو سراچه موټر کې په ريموټ کنټرول عیار شوي چاودېدونکي توکي په یوې لویې ګازډبې کې ځای پر ځای کړي وو.

ده زياته کړه چې کشفي منسوبينو دغه موټر نن سهار پنځه بجې د مزار ښار لسمې ناحیې اړوند تصدۍ پله سیمه کې کشف او ترلاسه کړ.

د عادل په خبره، مخالفینو پلان درلود چې دغه ریموټ کنټرول بم ته د ښار په یوې له ګڼې ګوڼې ډکه سیمه کې چاودنه ورکړي.

هغه وویل چې د دغو چاودېدونکو توکو په کشف سره یې د یوې لویې چاودنې او ګڼو کسانو ته د تلفاتو اوښتو مخه ونیول شوه.

د بلخ پولیسو ویاند وایي چې دغه ریموټ کنټرول بم ته د پولیسو له خوا له ښاره په یوه لرې سیمه کې چاودنه ورکول کېږي، د مزار ښاریان دې اندېښنه نه کوي.