ټولګټو وزارت: وسله والو مخالفینو د ۵۰۰ میلیون افغانیو په ارزښت ترانسپورټي بنسټونه وران کړي   

کابل (پژواک، ۲۲ غویی ۱۴۰۰): د ټولګټو وزارت ادعا کوي چې وسله والو مخالفینو په تېرو دوو کلونو کې د ۵۰۰ میلیونه افغانیو په ارزښت ترانسپورټي زېربناوې ورانې کړې دي.

دغه وزارت لیکي چې له ۱۳۹۸ کال څخه تر ۱۴۰۰ لمریز کال پورې په هېواد کې ۱۱ پلونه، ۳۵۲ پولګوټي، ۴۰۰ متره استنادي دیوالونه، په ۳۴۲ ځایونو کې پر سړک د مایونو چاودنې، او همدا رانګه د ماشینرۍ په مرسته څه باندې ۸ کیلو متره سړکونه وران شوي دي.

سرچینه زیاتوي چې د اټکلیزو شمېرو له مخې، د دې ترانسپورټي زېربناوو پر بیا جوړونه شاوخوا ۵۰۰ میلونه افغانۍ لګښت راځي چې د ټولګټو وزارت له خوا ځینې رغول شوي او ځینې نور تر کار لاندې دي.

د دولت وسله والو مخالفینو تر اوسه په دې اړه رسنیو ته څه نه دي ویلي.