کابل (پژواک، ٢٦ غويى ١٤٠٠): د کوچني اختر په درېيو ورځو کې د اعلان شوي اوربند مودې له پاى ته رسېدو سره سم په هېواد کې بېرته جګړې پيل شوې.
وسله والو طالبانو د روژې مياشتې په وروستيو کې د اختر په درېيو ورځو کې د اوربند اعلان وکړ چې ورپسې ولسمشر اشرف غني هم د اوربند اعلانولو ترڅنګ امنيتي ځواکونو ته سپارښتنه وکړه چې په دفاعي حالت کې و اوسي.
خو د حکومت ګڼو سياسي مشرانو د اوربند غځېدو غوښتنه کوله چې د طالبانو له خوا رد شوه.
د طالبانو د قطر دفتر وياند ډاکتر نعيم رسنيو ته ويلي وو چې دوى نه غواړي له اختر وروسته اوربند وغځوي.
بلخوا ولسمشر اشرف غني د قول اردو له قوماندانانو سره په ټيلېفوني اړيکه کې سپارښتنه کړې، که چېرې طالبان جګړې ته دوام ورکوي، تاسې هم باید د مقابلې لپاره لازم چمتووالی ولرئ.
ارګ وايي، د قول اردوګانو قوماندانانو او د زونونو امنیتي مرکزونو مسوولینو ولسمشر ته ډاډ ورکړ، که طالبان اوربند ونه کړي او جګړې ته دوام ورکړي، د هېواد په هره سیمه کې به یې وځپي.
بلخوا تېره شپه ١٢ بجې د اوربند مودې له پاى ته رسېدو سره سم په بېلابېلو ولايتونو کې جګړې پيل شوې دي.
په هلمند ولايت کې د ٢١٥ قول اردو له خوا په يوه خپره شوې خبرپاڼه کې راغلي چې ځواکونو يې تېره شپه د لښکرګاه اړوند سيمو او ناوې ولسوالۍ کې چاڼيز عمليات پيل کړي دي.
سرچينې زياته کړې چې افغان دفاعي ځواکونو د تېرو لسو ساعتونو د تعرضي عملياتو له پيله د هلمند ولايت لښکرګاه غربي سيمو او د نهرالسراج په ولسوالۍ کې د مارجې ولسوالۍ لپاره د طالبانو نظامي مسوول او د لښکرګاه ښار نوي مسوول محسني په ګډون ۲۰ طالبان وژلي او ۱۳ نور يې ټپيان کړي دي.
قول اردو ويلي چې دغه راز د دغو عملياتو په ترڅ کې د ماين جوړونې یو ډيپو، ۱۴ ماينونه او ۵۰ کيلوګرامه چاودېدونکي توکي هم له منځه وړل شوي دي.
د ملي دفاع وزارت وياند فواد امان پژواک ته وويل چې طالبانو په ١٨ ولايتونو کې له اوربنده سرغړونې کړې او د یادې مودې له پاى ته رسېدو سره سم يې بريدونه زيات کړي دي.
هغه زياته کړه، د اوربند په ورځو کې چې د هېواد په بېلابېلو ولايتونو کې د چاودنو او امنيتي پېښو کې ٢١ ملکي وګړي وژل شوي او ٣٣ نور ټپيان شوي دي.
Views: 112
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن