ملي دفاع وزارت د ۱۴۷وسله والو د وژلو ادعا وکړه

کابل(پژواک، ۳۱ غویی ۱۴۰۰۹): ملي دفاع وزارت ادعا کوي چې په تېرو ۲۴ ساعتونو کې ۱۴۷ طالبان وژل شوي، ۹۰ ټپيان او درې نور نیول شوي، خو وسله وال طالبان دغه ادعا بې بنسټه بولي.

د ملي دفاع وزارت له لوري پژواک اژانس ته په رالېږل شوې خبرپاڼه کې راغلي چې له دفاعي او امنيتي ځواکونو سره خوابي بریدونو او نښتو کې ۱۴۷ طالبان ووژل شول، ۹۰ ټپیان شول او درې کسان ونیول شول او همداراز د دښمن زیاته اندازه وسلې او مهمات له منځه وړل شوي دي.

سرچینه وایي چې د دې ترڅنګ،۲۴ بېلابېل ډول ماینونه چې طالبانو د هېواد په بېلابېلو سیمو کې د ملکي خلکو، دفاعي او امنیتي ځواکونو د تګ راتګ په لارو کې ځای پرځای کړي وو، د ملي اردو ځواکونو له لوري کشف او شنډ شوي دي.

د ملی دفاع وزارت وایي چې دغه طالبان ننګرهار، میدان وردګ، لغمان، کندهار، هرات، فاریاب، بلخ، کندوز، هلمند، نیمروز، بغلان او کابل ولایتونو کې وژل شوي او ټپيان شوي دي.

خو د طالبانو ویاند ذبیح الله مجاهد پژواک اژانس ته وویل چې د دفاع وزارت یاده ادعا بې بنسټه ده او په یاده موده کې دوی ته هیڅ تلفات نه دي اوښتي او دا پروپاګنډ دی.