په خوست کې د چاودنې له امله څلور ملکي وګړي وژل شوي

خوست (پژواک، ۲۹ غبرګولی ۱۴۰۰) : چارواکي وايي، د خوست په موسی خېلو ولسوالۍ کې پر ملکي خلکو د ماين چاودنه شوې، چې له امله يې څلور کسان وژل شوي دي.

د موسی خېلو ولسوال کمال خان منګل د غبرګولي په ۲۹مه، پژواک خبري اژانس ته وويل چې دغه چاودنه نن سهار شاوخوا اته بجې د یادې ولسوالۍ د «سره» په سيمه کې شوې.

هغه زیاته کړه، دغه کسان پلي روان وو چې د وسله والو طالبانو له خوا په سړک کې پر اېښودل شوي ماین ور برابر شوي او چاودنه يې پرې کړې ده.

د نوموړي په وینا، په دغې چاودنه کې څلور ملکي وګړي ځای پر ځای وژل شوي دي.

د خوست امنيه قوماندانۍ مطبوعاتي مسوول نجيب احمد نجيب هم پژواک اژانس ته د پېښې پخلی وکړ، خو نور جزییات يې ور نه کړل.

وسله والو طالبانو تراوسه په دې اړه څه نه دي ويلي.