ولسمشر اشرف غني او ډاکټر عبدالله په رسمي سفر امریکا ته ځي

کابل (پژواک، ۳۰ غبرګولی ۱۴۰۰) : دامریکا سپینې ماڼۍ  اعلان کی چې د افغانستان ولسمشر اشرف غني او د ملي روغې جوړې شورا رییس ډاکتر عبدالله عبدالله به روانه اونۍ کې واشنګټن ته رسمي سفر کوي.

د سپينې ماڼۍ لخوا د غبرګولي په ۳۰مه، په یوه خپره شوې خبرپاڼه کې راغلي چې دواړه افغان مشران به د راتلونکې جمعې په ورځ ( د جون په ۲۵مه) په سپینه ماڼۍ کې ولسمشر جو بایډن سره وګوري.

سرچینې زیاته کړې، په دې کتنه کې به له افغانستانه د بهرنیو پوځیانو د وتلو په درشل کې د افغانستان او امریکا پر دوامداره ملګرتیا خبرې کېږي.

اعلامیه کې راغلي، امریکا ژمنه ده چې د افغان ولس، ښځو، نجونو او لږکیو د ملاتړ لپاره دیپلوماتیکې، اقتصادي او بشري مرستې وکړي.

د امریکا حکومت یو ځل بیا ټینګار کړی چې له افغان حکومت سره د ګډ کار له لارې به اجازه ورنکړي چې افغانستان یو ځل بیا د ترهګرو ډلو لپاره په خوندي پټنځای بدل شي.

سپینۍ ماڼۍ همدا راز یو ځل بیا د افغان سولې بهیر ملاتړ څرګند کړی او له ښکېلو غاړو یې غوښتي چې د جګړې د ختمولو لپاره دې معنا داره مذاکرات وکړي.

بلخوا حکومتي سرچینې وایي چې ولسمشر غني او ډاکتر عبدالله عبدالله به د سه شنبې په ورځ د واشنګټن په  لوري روانیږي او یوه اونۍ به هلته تیروي.

دا سفر په داسې حال کې کیږي چې د افغان سولې پروسه په ټپه ولاړه او په افغانستان کې جګړو زور اخیستی دی